நோபல் போட்டியில் டிரம்ப்!

அமைதிக்கான நோபல் பரிசுக்காக அமெரிக்க அதிபர் டொனால்ட் டிரம்ப் பெயரைப் பரிந்துரைக்க முடிவெடுத்துள்ளதாக பாகிஸ்தான் அறிவித்தது அந்நாட்டில் கடும் விமர்சனத்தையும், எதிர்ப்பையும் சந்தித்துள்ளது.

- சு.வெங்கடேஸ்வரன்

அதேநேரத்தில் தனது அமைதிப் பணிகளுக்காக தனக்கு இதுவரை 4 முதல் 5 முறை நோபல் பரிசு வழங்கப்பட்டிருக்க வேண்டும் என்றும், நோபல் பரிசு தாராளமயக்கொள்கையைக் கொண்ட தலைவர்களுக்கு மட்டுமே வழங்கப்படுகிறது, தமக்கு தரமாட்டார்கள் என்றும் டிரம்ப் அதிருப்தி தெரிவித்தார்.

இது ஒருபுறம் இருக்க இதுவரை எத்தகைய உலகத் தலைவர்களுக்கு அமைதிக்கான நோபல் பரிசு வழங்கப்பட்டுள்ளது என்ற கடந்தகால அமைதி நோபல் வரலாற்றைத் திருப்பிப் பார்த்தால் டிரம்ப் கூறுவதில் எந்த அளவுக்கு நியாயம் உள்ளது என்பது தெரியவரும்.

கடந்த 2009-இல் அப்போதைய அமெரிக்க அதிபர் பராக் ஒபாமாவுக்கு அமைதிக்கான நோபல் பரிசு வழங்கப்பட்டது. ஆனால், சமீபகால அமெரிக்க அதிபர்களில் வெளிநாடுகள்மீது அதிக தாக்குதல்களை நடத்தி ஏராளமான அப்பாவி மக்களின் உயிரிழப்புகளுக்கு காரணமாக இருந்தவர் ஒபாமா.

ஒபாமா ஆட்சிக் காலத்தில் ஆப்கானிஸ்தான், இராக், சிரியா, லிபியா, யேமன், சோமாலியா, பாகிஸ்தான் என 7 நாடுகள் குண்டு களால் துளைத்தெடுக்கப்பட்டன. இவை அனைத்தும் பயங்கரவாதி ஒசாமா பின்லேடன், தலிபான் உள்ளிட்ட பல்வேறு பயங்கரவாத அமைப்பினரைக் குறிவைக்கும் தாக்குதல் எனக் கூறப்பட்டது. ஆனால், இதில் பொது மக்களும் பெருமளவில் உயிரிழந்தனர்.

ஒபாமாவுக்கு முன்பு அதிபராக இருந்த ஜார்ஜ் டபிள்யு புஷ் ஆட்சிக் காலத்தைவிட ஒபாமா ஆட்சிக் காலத்தில் வெளிநாடுகளில் அமெரிக்க தாக்குதல் 10 மடங்கு வரை அதிகரித்தது.