நாக் அவுட் சுற்றில் மெக்ஸிகோ

ஃபிஃபா உலகக் கோப்பை கால்பந்து போட்டியில் மெக்ஸிகோ தொடர்ந்து இரு வெற்றிகளைப் பதிவு செய்து, முதல் அணியாக நாக் அவுட் சுற்றுக்கு (ரவுண்ட் ஆஃப் 32) வெள்ளிக்கிழமை முன்னேறியது. கனடா, சுவிட்ஸர்லாந்து அணிகள் தங்கள் ஆட்டங்களில் அபார வெற்றி கண்டன.

- 

தென் கொரியாவை சாய்த்த மெக்ஸிகோ

இந்த ஆண்டு உலகக் கோப்பை போட்டியை நடத்தும் நாடுகளில் ஒன்றான மெக்ஸிகோ, தனது 2-ஆவது ஆட்டத்தில் 1-0 கோல் கணக்கில் தென் கொரியாவை வென்றது.

மெக்ஸிகோவுக்காக லூயிஸ் ரோமோ 50-ஆவது நிமிஷத்தில் கோல் அடித்தார். தென் கொரிய கோல் போஸ்ட் நோக்கி வந்த பந்தை அந்த அணியின் கோல் கீப்பர் கிம் சியுங் கியு கைப்பற்றினார்.

ஆனால், சக தென் கொரிய வீரர் லீ ஜி ஹியுக்குடன் எதிர்பாராத விதமாக அவர் மோதியதில், பந்து அவரிடமிருந்து நழுவியது. அவ்வாறு நழுவி பெனால்ட்டி ஏரியாவில் விழுந்த பந்தை, லூயிஸ் தன் வசப்படுத்தி எளிதாக கோல் அடித்தார்.

மறுபுறம், தென் கொரியாவின் கோல் முயற்சிகள் கடைசி வரை பலன் பெறாமலேயே போனது. குறிப்பாக, 87-ஆவது நிமிஷத்தில், மெக்ஸிகோவின் கோல் போஸ்ட் அருகே, தென் கொரியாவின் சோ கியு சங் தலையால் பந்தை முட்டி கோல் அடிக்க முயல, மெக்ஸிகோ கோல் கீப்பர் ரௌல் ராங்கெல் அதை திறம்பட தடுத்தார்.

அவர் தட்டிவிட்டு மீண்டும் களத்துக்கு வந்த பந்தை, மற்றொரு தென் கொரியரான யாங் ஹியுன் ஜூன் கோலாக மாற்ற முயல, அதையும் திறம்பட தடுத்தார் ராங்கெல். கடந்த உலகக் கோப்பை போட்டியில் குரூப் சுற்றுடனேயே வெளியேறிய மெக்ஸிகோ, இந்தப் போட்டியில் அடுத்த கட்டத்துக்கு முன்னேற்றம் கண்டுள்ளது குறிப்பிடத்தக்கது.

இதுவரையிலான தனது இரு ஆட்டங்களையும் சொந்த மண்ணில் விளையாடிய மெக்ஸிகோ, அதில் வெற்றி கண்டு ரசிகர்களுக்கு உற்சாகமளித்துள்ளது.

கனடாவுக்கு வரலாற்று வெற்றி

கனடாவின் வான்கூவர் நகரில் நடைபெற்ற ஆட்டத்தில், போட்டியை நடத்தும் நாடுகளில் ஒன்றான கனடா 6-0 கோல் கணக்கில் கத்தாரை அபார வெற்றி கண்டது. உலகக் கோப்பை கால்பந்து வரலாற்றில் கனடாவுக்கு இது முதல் வெற்றியாகும்.