அறப்பணியைத் தேர்ந்தெடுப்போம்!

"ஆசிரியர் பணி அறப்பணி - அதற்கே உன்னை அர்ப்பணி" என்று முன்பெல்லாம் ஆசிரியர் பணியை உன்னதமாகப் போற்றி வந்தார்கள்.

- பேராசிரியர் அ. ஜாஹிதா பேகம்

ஆனால், இன்று ஆசிரியர் பணிக்கு ஒரு பட்டப்படிப்பும், பி.எட். படிப்பும் இருந்தால் யார் வேண்டுமானாலும் வரலாம் என்ற நிலை ஏற்பட்டுள்ளது. மாறும் காலத்திற்கேற்ப ஆசிரியர் பணியும் மாறிவிட்டது.

பொதுவாக, நமது வீடுகளில் விடுமுறைக்காலங்களில் உறவினர் குழந்தைகளோ, பக்கத்து வீட்டு குழந்தைகளோ வந்துவிட்டால் அவர்களைச் சமாளிப்பது என்பது பலருக்கும் போதும், போதும் என்றாகிவிடும். மேலும், சிலருக்கோ தங்கள் குழந்தைகளைக்கூட விடுமுறை நாட்களில் சமாளிப்பது என்பது பெரும்பாடாகியிடும்.

ஆனால், ஒரு வகுப்பறையில், ஓர் ஆசிரியர் தினமும் 30 முதல் 60 மாணவர்களை அமர்த்தி, பாடம்நடத்தி, படிக்க வைத்து, நடத்தைகளைக் கண்காணித்து நல்வழிப்படுத்தி' என்று பட்டியல் நீண்டு கொண்டே உள்ளது. இதெல்லாம் எல்லோராலும் முடியுமா? அதனால்தான் இந்தப் பணிக்கென்றே சில குணநலன்கள், பண்புகள், நடத்தைகள் தேவை. அவற்றில் முக்கியமானது பொறுமை.

பொறுமையுடன் மாணவர்களைக் கையாண்டாலே போதும்; பாடம் நடத்துவது, கற்பிப்பது எல்லாம் பிறகுதான். அதனால்தான் யாருக்கெல்லாம் இந்த ஆசிரியர் பணியில் விருப்பம் இருக்கிறதோ, அவர்கள்தான் இந்தப் பணிக்கு ஏற்றவர்கள். ஆனால், இன்று கல்வி என்பது வியாபாரமாகி விட்டதால், குறைந்த செலவில் நிறைந்த வருமானம் என்று ஆசிரியர் பணிக்கு வருகின்றனர்.