கூவம் ஆற்றுத் தரைப்பால ஓரங்களில் சவுக்கு கட்டைகளால் தடுப்பு

திருவள்ளூர் அருகே புதுச்சத்திரம் கிராமத்திலிருந்து பெரியபாளையம் செல்லும் சாலையில் கூவம் ஆற்றைக் கடக்கும் வகையில் உள்ள தரைப்பாலம் அடிக்கடி சேதமடைவதால், பாதுகாப்பற்ற பயணம் மேற்கொண்டு வருவதைத் தவிர்க்கும் வகையில் மேம்பாலம் கட்ட நடவடிக்கை எடுக்க வேண்டும் என பொதுமக்கள் தொடர்ந்து கோரிக்கை விடுத்து வருகின்றனர்.

- சு.பாண்டியன்

திருவள்ளூர், ஜூன் 1:

திருவள்ளூர்-பூந்தமல்லி தேசிய நெடுஞ்சாலையில் உள்ள புதுச்சத்திரம் கிராமத்திலிருந்து பிரிந்து கூவம் ஆற்றைக் கடந்துதான் ஆவடி மற்றும் பெரியபாளையம் செல்லவேண்டும். இச்சாலை வழியாக ஆற்றைக் கடக்க தரைப்பாலம் அமைக்கப்பட்டுள்ளது. இதன் வழியாக வேப்பம்பட்டு, திருநின்றவூர், ஆவடி, பாக்கம், கசுவா, தாமரைபாக்கம் கூட்டுச்சாலை, பெரியபாளையம், கும்மிடிப்பூண்டி உள்ளிட்ட 40-க்கும் மேற்பட்ட பகுதிகளுக்கு செல்ல வேண்டும்.

ஆவடி, அம்பத்தூர் தொழில்பேட்டை மற்றும் பள்ளி, கல்லூரிகளுக்கும், தனியார் நிறுவனங்களுக்கும் வேலைக்குச் செல்லவும் தரைப்பாலத்தைப் பயன்படுத்தி வருகின்றனர். நாள்தோறும் நூற்றுக்கும் மேற்பட்ட வாகனங்கள், பயணிகள் பேருந்து, தொழிலாளர் பேருந்து உள்ளிட்டவை சென்று திரும்புகின்றன.