உதிர்ந்தது இலக்கிய ரோஜா!

அரசியல் வானில் பூத்துக் குலுங்கிய இலக்கிய ரோஜா உதிர்ந்தது. ஆம், காமராஜரின் பெருந்தொண்டன் குமரி அனந்தன் (92) மறைந்தார்.

- பீ.ஜெபலின் ஜான்

கன்னியாகுமரி மாவட்டம் அகத்தீஸ்வரத்தில் 1933, மார்ச் 19-இல் சுதந்திரப் போராட்ட தியாகி ஹரிகிருஷ்ணன்-தங்கம்மாள் தம்பதிக்கு மகனாகப் பிறந்தவர்தான் குமரி அனந்தன். இவரது இயற்பெயர் அனந்தகிருஷ்ணன். தமிழ் மீது தீராத காதல் கொண்ட குமரி அனந்தன், தமிழில் இளநிலை மற்றும் முதுநிலை பட்டம் பெற்றார்.

கிருஷ்ணகுமாரியை துணைவியாகக் கொண்ட இவருக்கு 4 மகள்கள் மற்றும் ஒரு மகன் உள்ளனர். தந்தை காங்கிரஸில் கோலோச்சினாலும், மகள் தமிழிசை சௌந்தரராஜன், பாஜகவில் தீவிர அரசியலில் ஈடுபட்டு வருகிறார். தமிழக பாஜக தலைவர், தெலங்கானா ஆளுநர், புதுச்சேரி துணைநிலை ஆளுநர் போன்ற முக்கிய பதவிகளை வகித்தவர்.

அரசியல் ஆர்வம் காரணமாக, அகில இந்திய காங்கிரஸ் கட்சியில் காமராஜரின் தொண்டராக 1954-இல் தன்னை இணைத்துக்கொண்டார் குமரி அனந்தன். காங்கிரஸ் பிளவுபட்டபோது, காமராஜர் தலைமையிலான ஸ்தாபன காங்கிரஸில் இளைஞர் அணித் தலைவராக கோலோச்சினார். 1971 பேரவைத் தேர்தலில் வண்ணாரப்பேட்டை தொகுதியில் தோல்வி அடைந்தாலும், அதே தொகுதிக்குள் வாடகைக்கு வீடு எடுத்து குடியேறினார்.

1977-இல் நடைபெற்ற மக்களவைத் தேர்தலில் நாகர்கோவில் தொகுதியில் போட்டியிட்டு வெற்றி பெற்றார். முன்னதாக, தனது ஆசான் காமராஜர் வென்ற தொகுதி என்பதால், அதை தன்வசப்படுத்திய மகிழ்ச்சியுடன் மக்களவையில் கால் பதித்தார். மக்களவையில் தமிழ் மொழியில் கேள்விகளைக் கேட்டு, இந்திய மொழிகள் அனைத்தும் அவையில் ஒலிக்க வேண்டும் என்று உரக்க குரல் எழுப்பினார்.