ஆயுதங்களைக் கைவிடுங்கள்: நக்ஸல்களுக்கு அமித் ஷா வலியுறுத்தல்

'நக்ஸல்கள் ஆயுதங்களைக் கைவிட்டு, சமூக அமைப்புமுறையில் இணைய வேண்டும்' என்று மத்திய உள் துறை அமைச்சர் அமித் ஷா வலியுறுத்தினார்.

- 

தந்தேவாடா, ஏப். 5:

நக்ஸல்கள் கொல்லப்படும் போது யாரும் மகிழ்ச்சி அடைவதில்லை என்றும் அவர் குறிப்பிட்டார்.

சத்தீஸ்கரில் நக்ஸல் தீவிரவாதத்தால் பாதிக்கப்பட்ட பஸ்தர் பகுதியில் உள்ள தந்தேவாடாவில் மாநில அரசு சார்பில் பழங்குடியினர் கலாசார திருவிழா கடந்த 3-ஆம் தேதி தொடங்கி நடைபெற்றது. பழங்குடியின நடனம், நாட்டுப்புற பாடல், நாடகம், இசை என பல்வேறு பிரிவுகளில் போட்டிகள் நடத்தப்பட்டன.

சனிக்கிழமை நடைபெற்ற நிறைவு நிகழ்ச்சியில் மத்திய அமைச்சர் அமித்ஷா பங்கேற்றுப் பேசியதாவது: நாட்டில் அடுத்த ஆண்டு மார்ச் மாதத்துக்குள் நக்ஸல் தீவிரவாதத்தை ஒழிக்க மத்திய அரசு உறுதிபூண்டுள்ளது. ஆயுதங்களைக் கைவிட்டு, சரணடையும் நக்ஸல்கள் சமூக கட்டமைப்பில் ஓர் அங்கமாக இருப்பார்கள். மற்றவர்களை பாதுகாப்புப் படையினர் பார்த்துக் கொள்வர்.

பஸ்தர் பகுதியில் துப்பாக்கிகள் சுடப்பட்ட நாட்களும் வெடிகுண்டுகளை வெடிக்கச் செய்த நாட்களும் கடந்துவிட்டன. எனவே, ஆயுதங்களை விட்டொழித்து, சமூக கட்டமைப்பில் இணையுமாறு நக்ஸல்களை கேட்டுக் கொள்கிறேன். நக்ஸல்கள் கொல்லப்படுவதால் யாருக்கும் மகிழ்ச்சி இல்லை. நீங்கள் (நக்ஸல்கள்) ஆயுதம் ஏந்துவதால், பழங்குடியின சகோதர-சகோதரிகளின் வளர்ச்சியைத் தடுக்க முடியாது.