சோதனைக் களத்துக்கு தயாராகும் மேற்கு வங்கம்!

மேற்கு வங்க சட்டப்பேரவைத் தேர்தலின் முதல் கட்ட வாக்குப் பதிவுக்கான (ஏப்ரல் 23) பரப்புரை செவ்வாய்க்கிழமை மாலையுடன் நிறைவடைந்தது.

- ம.ஆ. பரணிதரன்

இதன் தொடர்ச்சியாக ஏப். 23-ஆம் தேதி முதல் கட்ட வாக்குப் பதிவும், ஏப்ரல் 29-ஆம் தேதி நடக்கும் இரண்டாவது மற்றும் இறுதிக் கட்ட வாக்குப் பதிவும் நடைபெறுகிறது. அதன் பிறகு இந்த மாநிலத்தின் எதிர்காலத்தைமக்கள் யாரிடம் ஒப்படைக்கப்போகிறார்கள் என்ற எதிர்பார்ப்பு இப்போதே மேலோங்கியுள்ளது.'மா, மதி, மனுஷ்' என ஆளும் முதல்வர் மம்தா பானர்ஜியால் அழைக்கப்படும் தாய், மண், மக்கள் ஆகியவற்றைப் பாதுகாப்பது அவசியம் எனக் கூறி சட்டப் பேரவைத் தேர்தலை அகில இந்திய திரிணமூல் காங்கிரஸ் கட்சி சந்தித்து வருகிறது.

மறுபுறம், இந்தத் தேர்தலில் பாரதிய ஜனதா கட்சி முழு வீச்சில் இறங்கியுள்ளது.

ஒருபுறம் தேர்தல் வன்முறை அச்சம், மறுபுறம் தேர்தல் ஆணையம் மேற்கொண்ட வாக்காளர் பட்டியல் சிறப்பு தீவிர திருத்த (எஸ்ஐஆர்) நடவடிக்கையின் தாக்கம் எனக் கிட்டத்தட்ட அனைத்து அரசியல் கட்சிகளுக்குமே இந்த தேர்தல் மிகப்பெரிய சோதனைக் களமாக விளங்குகிறது.

முதல் கட்ட வாக்குப் பதிவை கூச் பெஹார் முதல் தினாஜ்பூர் வரையிலான பகுதிகளை உள்ளடக்கிய வடக்கு மாவட்டங்கள் எதிர்கொள்கின்றன. 2021-ஆம் ஆண்டில், கோர்க்காலாந்து விவகாரம், பழங்குடியின அடையாளம், வளர்ச்சி தொடர்பான கவலைகள் ஆகியவற்றைத் தேர்தல் முழக்கமாக்கி பாஜக வேரூன்றத் தொடங்கியது. 2026-ஆம் ஆண்டிலும் அதே முழக்கத்தோடு அக்கட்சி வாக்கு வேட்டையில் ஈடுபட்டது.

மாநிலத்தின் வடக்குப் பகுதிகளில், முந்தைய தேர்தலின்போது நிலவிய 'ஆட்சிக்கு எதிரான மனநிலையை' ஈடு கட்ட, திரிணமூல் காங்கிரஸ் 'லட்சுமி பண்டார்' மற்றும் சமூகப் பாதுகாப்புத் திட்டங்களை அறிமுகப்படுத்தி மக்களின் வரவேற்பைப் பெற்றுள்ளது.