வாக்குத் திருட்டுக்கு பாஜக-தேர்தல் ஆணையம் கூட்டணி

'வாக்குகளைத் திருடுவதற்காக பாஜகவும் தேர்தல் ஆணையமும் கூட்டணி அமைத்துள்ளன' என்று குற்றஞ்சாட்டிய எதிர்க்கட்சித் தலைவர் ராகுல் காந்தி, 'பிகாரில் ஒரு வாக்கை திருடுவதற்குக்கூட எதிர்க்கட்சிகளின் மகா பந்தன் கூட்டணி அனுமதிக்காது' என்று உறுதிபடத் தெரிவித்தார்.

- ராகுல் காந்தி

நவாடா (பிகார்), ஆக. 19:

வாக்குத் திருட்டுக்கு எதிரான போராட்டத்தை மக்கள் இயக்கமாக மாற்றும் வாக்குரிமை பயணத்தை ராகுல் காந்தி பிகாரில் ஞாயிற்றுக்கிழமை தொடங்கினார். பிகாரின் நவாடா பகுதியில் மூன்றாம் நாள் பயணத்தை எதிர்க்கட்சித் தலைவர்களுடன் தொடங்கிய ராகுல் பேசியதாவது:

மக்களுக்கு வாக்குரிமையை அரசமைப்புச் சட்டம் வழங்கியுள்ளது. ஆனால், அந்த உரிமையை பிரதமர் நரேந்திர மோடியும், மத்திய உள்துறை அமைச்சர் அமித் ஷாவும், தேர்தல் ஆணையமும் பறித்து வருகின்றனர்.

ஹரியாணா, மகாராஷ்டிரம் மற்றும் மத்திய பிரதேச மாநில சட்டப்பேரவைத் தேர்தல்களின்போது பாஜகவும் தேர்தல் ஆணையமும் கூட்டணி அமைத்து வாக்குகளைத் திருடியுள்ளன. வாக்குத் திருட்டு 'பாரத மாதா' மீதான தாக்குதலாகும்.