சிறுநீரக விற்பனை குறித்து சிபிஐ விசாரணை கோரிய மனுவுக்கு தமிழக அரசு பதிலளிக்க உத்தரவு

சிறுநீரக விற்பனை குறித்து சிபிஐ விசாரணை நடத்தக் கோரி தாக்கல் செய்யப்பட்ட மனுவுக்கு தமிழக அரசு பதில் அளிக்க சென்னை உயர் நீதிமன்ற மதுரை அமர்வு செவ்வாய்க்கிழமை உத்தரவிட்டது.

- 

மதுரை, ஆக. 19:

பரமக்குடியைச் சேர்ந்த சத்தீஸ்வரன் சென்னை உயர் நீதிமன்ற மதுரை அமர்வில் தாக்கல் செய்த மனு: நாமக்கல் மாவட்டத்தில் சட்டவிரோத சிறுநீரக விற்பனை மோசடியை மிகவும் ஆபத்தான, தீவிரமான பிரச்னையாக கருத வேண்டியுள்ளது.

பள்ளிப்பாளையத்தில் உள்ள விசைத்தறித் தொழிலாளர்கள், சாய ஆலைகளில் பணியாற்றும் ஏழைத் தொழிலாளர்கள் சிலரின் தூண்டுதலால் சிறுநீரக தானம் செய்பவர்களாக மாறியுள்ளனர் என்பது மிகவும் வேதனைக்குரியது.

இதில் முகவர்கள், மருத்துவர்கள், மருத்துவமனை அதிகாரிகளும் சம்பந்தப்பட்டிருக்கின்றனர். பாதிக்கப்பட்டவர்களின் வறுமைச் சூழலை பயன்படுத்தி, ரூ. 5 லட்சம் முதல் ரூ. 10 லட்சம் வரை வழங்கி, அவர்களை சிறுநீரக தானம் செய்ய இடைத்தரகர்கள் கட்டாயப்படுத்தியிருப்பது தெரியவந்தது.