ஜம்மு-காஷ்மீர் பெருவெள்ளம்: மீட்புப் பணிகள் தீவிரம்

ஜம்மு-காஷ்மீரின் கிஷ்த்வார் மாவட்டத்தில் உள்ள சோசிடி கிராமத்தில் கடந்த வியாழக்கிழமை ஏற்பட்ட மேகவெடிப்பைத் தொடர்ந்து, வெள்ளத்தில் சிக்கி மாயமான 82 பேரைத் தேடும் பணி 3-ஆவது நாளாக சனிக்கிழமையும் தீவிரமாக தொடர்ந்தது.

- 

கிஷ்த்வார்/ஜம்மு, ஆக. 16:

இந்த இயற்கை பேரழிவால் இதுவரை 60 பேர் உயிரிழந்ததுடன் 100-க்கும் மேற்பட்டோர் காயமடைந்துள்ளனர் என்பது குறிப்பிடத்தக்கது.

கிஷ்த்வார் மாவட்டத்தின் புகழ்பெற்ற மச்சயில் மாதா கோயில் அமைந்துள்ள 9,500 அடி உயர மலைப்பகுதிக்குச் செல்லும் வழியில் சோசிடி கிராமம் அமைந்துள்ளது. இந்தக் கிராமம் வரை மட்டுமே வாகனங்களில் செல்ல முடியும். பின்னர் அங்கிருந்து, பக்தர்கள் 8.5 கிலோமீட்டர் தூரம் நடந்து, கோயிலைச் சென்றடைய வேண்டும்.

வருடாந்திர யாத்திரையின் காரணமாக, சோசிடி கிராமத்தில் கடந்த வியாழக்கிழமை ஏராளமான பக்தர்கள் திரண்டிருந்த நிலையில் எதிர்பாராத விதமாக மேகவெடிப்பு ஏற்பட்டது. இதனால் பலத்த மழை பெய்து, மலையிலிருந்து சகதி மற்றும் பாறைகளுடன் வெள்ளம் பெருக்கெடுத்து ஓடியது.