அமெரிக்க வரி உயர்வால் தமிழ்நாட்டின் உற்பத்தி-வேலைவாய்ப்பில் பாதிப்பு

வரிச் சலுகைகளை அளிக்க பிரதமருக்கு முதல்வர் மு.க.ஸ்டாலின் கடிதம்

- 

சென்னை, ஆக. 16: அமெரிக்காவின் வரி உயர்வால் தமிழ்நாட்டில் ஏற்படும் உற்பத்தி, வேலைவாய்ப்பு பாதிப்புகளை மீட்டெடுக்க நடவடிக்கை எடுக்க வேண்டும் என முதல்வர் மு.க.ஸ்டாலின் வலியுறுத்தியுள்ளார்.

இதுகுறித்து பிரதமர் நரேந்திர மோடிக்கு அவர் சனிக்கிழமை எழுதியுள்ள கடிதம்: இந்தியாவுக்கும் அமெரிக்காவுக்கும் இடையே வர்த்தக ஒப்பந்தத்தை எட்டுவதற்கு மத்திய அரசு மேற்கொண்டுள்ள முயற்சிகளைப் பாராட்டுவதுடன், தேசிய நலன்களைப் பாதுகாப்பதற்கான நிலைப்பாட்டையும் முழுமையாக ஆதரிக்கிறேன்.

அமெரிக்காவின் வரி உயர்வால் ஏற்படும் கடும் தாக்கங்களை தமிழ்நாடும் எதிர்கொள்ள வேண்டியிருப்பதால் உருவாகியுள்ள கவலை அளிக்கும் பிரச்னையை தங்களது கவனத்துக்குக் கொண்டு வர விரும்புகிறேன்.

கடந்த நிதியாண்டில் இந்தியாவின் மொத்த ஏற்றுமதி மதிப்பானது 433.6 பில்லியன் டாலராக இருந்தது. அதில் 20 சதவீதம் பொருள்கள் அமெரிக்காவுக்கு ஏற்றுமதி செய்யப்பட்டன.

தமிழ்நாட்டின் மொத்த ஏற்றுமதி பொருள்களின் மதிப்பு 52.1 பில்லியன் டாலராக இருந்தது. அதில் 31 சதவீதம் அமெரிக்காவுக்கு ஏற்றுமதி செய்யப்பட்டுள்ளது.