கர்நாடக போக்குவரத்து கழக ஊழியர்களின் வேலைநிறுத்தம் வாபஸ்

கர்நாடகத்தில் உயர் நீதிமன்றத்தின் உத்தரவை தொடர்ந்து, தொடர் வேலைநிறுத்த போராட்டத்தை கைவிட்டு அரசு போக்குவரத்துக் கழகங்களின் ஊழியர்கள் செவ்வாய்க்கிழமை மாலை பணிக்குத் திரும்பினர்.

- 

பெங்களூரு, ஆக.5:

38 மாதங்களாக நிலுவையில் உள்ள ஊதிய உயர்வு விடுவிப்பது உள்ளிட்ட 38 கோரிக்கைகளை முன்வைத்து செவ்வாய்க்கிழமை காலை 6 மணி முதல் கர்நாடக மாநில சாலை போக்குவரத்துக் கழகம், வட மேற்கு கர்நாடக மாநில சாலை போக்குவரத்துக் கழகம், கல்யாண கர்நாடக மாநில சாலை போக்குவரத்துக் கழகம், பெங்களூரு மாநகர போக்குவரத்துக் கழகங்களின் ஊழியர்கள் தொடர் வேலை நிறுத்தத்தை தொடங்கினர்.

தொழிற்சங்கங்களின் கூட்டுசெயல்பாட்டுக்குழுவினருடன் முதல்வர் சித்தராமையா நடத்திய பேச்சுவார்த்தை தோல்வியில் முடிந்தது. இதனிடையே, அரசு போக்குவரத்துக் கழக ஊழியர்களின் தொடர் வேலை நிறுத்த போராட்டத்திற்கு தடை விதிக்கக் கோரி கர்நாடக உயர்நீதிமன்றத்தில் பொது நலமனு தாக்கல் செய்யப்பட்டது.