தொழில்துறையும், வேளாண்மையும் அதிமுகவுக்கு இருகண்கள்

எடப்பாடி கே. பழனிசாமி பேச்சு

- 

திருச்சி, ஆக. 25: அதிமுகவுக்கு தொழில்துறையும், வேளாண் துறையும் இரு கண்கள் போன்றது என அக்கட்சியின் பொதுச் செயலர் எடப்பாடி கே. பழனிசாமி தெரிவித்தார்.

திருச்சி மாவட்டத்தில் 3 நாட்கள் பிரசார சுற்றுப்பயணம் மேற்கொண்டுள்ள அவர், திருச்சியில் உள்ள தனியார் ஹோட்டலில் திங்கள்கிழமை, விவசாயிகள், தொழில் துறையினர், மருத்துவர்கள், நகர் நலச் சங்கத்தினருடன் கலந்துரையாடினார். அப்போது, கோரிக்கை மனுக்களைப் பெற்றுக் கொண்டு எடப்பாடி கே. பழனிசாமி பேசியதாவது:

அனைத்து தரப்பு மக்களுக்கும் உணவும், தண்ணீரும் அத்தியாவசியமானது. எனவேதான், எனது தலைமையிலான அதிமுக ஆட்சியில் நீர் மேலாண்மைக்கு தனி அமைப்பு உருவாக்கி, நிபுணர்களை நியமித்து தமிழகம் முழுவதும் ஆய்வு செய்து தேவையான இடங்களில் தடுப்பணை கட்டுவது, நீர்நிலைகளைத் தூர்வாருவது குறித்து ஆய்வு செய்யப்பட்டது.

காவிரியில் மட்டும் முசிறி உள்பட 4 இடங்களில் தடுப்பணை கட்ட அரசாணை வெளியிடப்பட்டது. ஆனால், ஆட்சி மாற்றம் ஏற்பட்டு திமுக ஆட்சிக்கு வந்தவுடன் இந்த அரசாணை ரத்து செய்யப்பட்டது. ஆதனூர்-குமாரமங்கலத்தில் கட்டிய தடுப்பணையில் தண்ணீர் தேக்குவதற்குக் கூட திமுக அரசு நடவடிக்கை எடுக்கவில்லை. கரூர் நன்செய் புகளூரில் தடுப்பணையும் கிடப்பில் உள்ளது.