சிறுதானிய உற்பத்தியைப் பெருக்க ரூ.52.44 கோடி

தமிழக அரசு அறிவித்ததுள்ள இரண்டு சிறுதானிய சிறப்பு மண்டலங்களில் நிகழாண்டு (2025-2026) ரூ.52.44 கோடியில் சிறுதானிய உற்பத்தியை அதிகரிக்கும் திட்டம் செயல்படுத்தப்படவுள்ளது.

- ஆர். முருகன்

திருச்சி, ஆக. 3: இதன்படி, 10 லட்சம் ஹெக்டேரில் 39.28 லட்சம் மெட்ரிக் டன்னுக்கு இலக்கு நிர்ணயிக்கப்பட்டுள்ளது. கடந்த ஆண்டு (2024-25) இத்திட்டத்தில் ரூ.46 கோடி ஒதுக்கீடு செய்து 4.15 லட்சம் விவசாயிகள் பயன்பெற்றிருப்பது குறிப்பிடத்தக்கது.

அளவில் சிறுத்து, ஊட்டத்தில் பெருத்து, உடலை உறுதியாக்குபவை சிறுதானியங்கள். இதற்கு வலு சேர்க்கும் வகையில் 2023-ஆம் ஆண்டை சிறுதானிய ஆண்டாக ஐக்கிய நாடுகள் சபை அறிவித்தது.

அதை தமிழக அரசு வழிமொழிந்து, தமிழ்நாடு சிறுதானிய இயக்கத்தின் மூலம் 2023 - 2024-ஆம் ஆண்டில் ஐந்தாண்டு திட்டத்தை அறிவித்தது. இதன்படி, தமிழகத்தில் இரண்டு சிறப்பு சிறுதானிய மண்டலங்கள் உருவாக்கப்பட்டுள்ளன.

திருவண்ணாமலை, சேலம், கள்ளக்குறிச்சி, விழுப்புரம், கடலூர், தருமபுரி, கிருஷ்ணகிரி, வேலூர், நாமக்கல், திருப்பூர், கோயம்புத்தூர், ஈரோடு ஆகிய 12 மாவட்டங்களைக் கொண்டு சிறப்பு மண்டலம்-1, திருச்சி, கரூர், அரியலூர், பெரம்பலூர், புதுக்கோட்டை, தூத்துக்குடி, விருதுநகர், மதுரை, தென்காசி, இராமநாதபுரம், சிவகங்கை, திண்டுக்கல், தேனி ஆகிய 13 மாவட்டங்களைக் கொண்டு சிறப்பு மண்டலம்-2 உருவாக்கப்பட்டுள்ளது.