'ரீல்ஸ்'களுக்குப் பின்னால்...!

பொழுதுபோக்குக்காக மட்டுமின்றி, இளைஞர்களின் அடையாளம், திறமை, சமூகப் பங்களிப்பு ஆகியவற்றை வெளிப்படுத்தும் தளமாக உள்ள சமூக ஊடகங்கள் பலரின் வாழ்வில் எதிர்மறை விளைவுகளையே விளைவிக்கிறது. கவனம் ஈர்க்கும் உளவியல் நுட்பத்தில் இசை, உரை, வசனம், பாடல், காட்சித் தொகுப்பு கொண்டு 15-90 விநாடிகளில் உருவாக்கப்படும் 'ரீல்ஸ்' என்ற குறும்பட காணொலி பெரும்பாலானோரை பார்க்கச் செய்கிறது.

- பேராசிரியர் தி. ஜெயராஜசேகர்

சமீபத்திய புள்ளிவிவரங்களின்படி இந்தியாவில் 18-30 வயதுடையோரில் சுமார் 78% பேர் தினமும் குறைந்தது ஒரு முறையாவது 'ரீல்ஸ்' பார்ப்பதாகக் கூறப்படுகிறது. தொழில்நுட்பம், பொழுதுபோக்கில் ஈடுபாடு கொண்ட தமிழக இளைஞர்கள் தினசரி 1.5 மணி முதல் 2 மணி நேரம் 'ரீல்ஸ்' காணொலிகளில் செலவிடுவதாக ஆராய்ச்சிகள் தெரிவிக்கின்றன.

பதிவேற்றப்படும் 'ரீல்ஸ்கள்' பார்க்கப்படும்போதும், விரும்பப்படும் போதும் மகிழ்ச்சியை ஏற்படுத்தும் மூளையின் 'டோப்பமைன்' விளைவு அனைவராலும் பாராட்டப்பட வேண்டும், கவனிக்கப்பட வேண்டும் என்ற தன்னம்பிக்கையற்ற அங்கீகார உணர்வு; மற்றவர்களைவிட குறைவான பின்தொடர்பவர்கள் (ஃபாலோயர்ஸ்) இருக்கும் காரணத்தால் அதிகமான 'ரீல்ஸ்' காணொலிகளைப் பதிவேற்றம் செய்யும் தன் நிலை அறியாத ஒப்பீட்டு மனநிலை; வேலை, கல்வி, குடும்ப பிரச்னைகளுக்கு மாற்றாக 'ரீல்ஸ்' காணொலிகளைப் பார்க்கும் பழக்கம் ஏற்படுத்தும் எதார்த்தத்திலிருந்து தப்பிக்கும் மனநிலை; குறுகிய காலத்தில் காட்சிகள், பாடல்கள், சம்பவங்கள் கொண்ட சுவாரஸ்யமான செய்திகள் ஊக்குவிக்கும் நூதன மற்றும் வேகமான மூளைச் செயல்பாடு; சமூக ஊடகங்களைக் கொண்டு சுய மதிப்பீடு செய்து கொள்ளச் செய்யும் புகழின் மீதான வெறி போன்ற உளவியல் காரணங்களால் 'ரீல்ஸ்' காணொலிகள் சமூக ஊடகங்களில் பிரபலமாக உள்ளன.