நகல் வாக்காளர் அடையாள அட்டை, தொகுதி மறுவரையறை குறித்து விவாதம் நடத்த வேண்டும்

மாநிலங்களவையில் திரிணமூல் காங்கிரஸ், திமுக வலியுறுத்தல்

- நமது நிருபர்

புது தில்லி, மார்ச் 18: நகல் வாக்காளர் அடையாள அட்டை எண்கள் மற்றும் தென் மாநிலங்களில் தொகுதி மறுசீரமைப்பு நடவடிக்கையால் ஏற்படும் விளைவு குறித்து மாநிலங்களவையில் விவாதம் நடத்த வேண்டும் என்று திரிணமூல் காங்கிரஸ், திமுக எம்.பி.க்கள் செவ்வாய்க்கிழமை வலியுறுத்தினர்.

மாநிலங்களவையில் செவ்வாய்க்கிழமை சில விவகாரங்களை விவாதிக்க அவை அலுவல்களை ஒத்திவைக்க வேண்டும் என்று கோரி விதி 267-இன் கீழ் வழங்கப்பட்ட நோட்டீஸ்களை அவைத் தலைவர் ஜகதீப் தன்கர் நிராகரித்தார். அப்போது, இந்த விவகாரம் விதி 176-இன் கீழ் விவாதிக்கப்பட வேண்டும் என்று எதிர்க்கட்சிகள் வலியுறுத்தின.