பெண்கள் பாதுகாப்புக்கு அரசு உயர் முன்னுரிமை: பிரதமர் மோடி

பெண்களின் பாதுகாப்புக்கு மத்திய அரசு உயர் முன்னுரிமை அளிக்கிறது; பாலியல் வன்கொடுமை போன்ற கொடூரக் குற்றங்களுக்கு மரண தண்டனை விதிக்கும் வகையில் சட்டங்கள் திருத்தப்பட்டன என்று பிரதமர் நரேந்திர மோடி தெரிவித்தார்.

- 

நவ்சாரி, மார்ச் 8:

சர்வதேச மகளிர் தினமான சனிக்கிழமை (மார்ச் 8), குஜராத் மாநிலம், நவ்சாரியில் உள்ள வன்சி போர்சி கிராமத்தில் நடைபெற்ற 'லட்சாதிபதி சகோதரி திட்ட நிகழ்ச்சியில் பிரதமர் மோடி பங்கேற்றார்.

சுமார் ஒன்றரை லட்சத்துக் கும் மேற்பட்ட பெண்கள் கலந்து கொண்ட இந்த பிரம்மாண்ட நிகழ்ச்சியில் பிரதமர் பேசியதாவது:

அனைத்துப் பெண்களுக்கும் மகளிர் தின வாழ்த்துகள். பெண்களுக்கு மதிப்பளிப்பதே, தேசம் மற்றும் சமூகத்தின் வளர்ச்சிக்கான முதல் படி. விரைவான முன்னேற்றத்துக்காக, பெண்கள் தலைமையிலான வளர்ச்சிப் பாதையில் நாடு பயணிக்கிறது. பெண்களின் கண்ணியம், வசதிக்கு அரசு முன்னுரிமை அளிக்கிறது.

கோடிக்கணக்கான வீடுகளில் கழிப்பறைகள் கட்டப்பட்டு, பெண்களின் கண்ணியம் உறுதி செய்யப்பட்டது. பிரதமரின் வீட்டு வசதி திட்டத்தின் கீழ், கடந்த 10 ஆண்டுகளில் 3 கோடி பெண்கள் வீட்டு உரிமையாளர்களாகி உள்ளனர். பேறுகால விடுமுறை 12 வாரங்களில் இருந்து 26 வாரங்களாக அதிகரிக்கப்பட்டது.

முஸ்லிம் சகோதரிகளின் வாழ்க்கையைப் பாதுகாக்க கடுமையான முத்தலாக்தடை சட்டம் இயற்றப்பட்டது. 370-ஆவது பிரிவு நீக்கத்தின் மூலம் ஜம்மு-காஷ்மீரில் பெண்களின் சொத்துரிமை நிலைநாட்டப்பட்டது.