பெண்களின் பாதுகாப்பை உறுதி செய்வோம்

நம் நாட்டின் மொத்த மக்கள்தொகையில் சரி பாதியாகப் பெண்கள் உள்ளனர். மக்கள் நலன் நாடும் சட்டப்பேரவை, நாடாளுமன்ற உறுப்பினர்களாக, நிர்வாகத் திறன் மிக்க ஆட்சியாளர்களாக மட்டுமன்றி நீதி, கல்வி, கலை, இலக்கியம் உள்ளிட்ட பல்வேறு துறைகளில் தங்கள் திறனை பெண்கள் வெளிப்படுத்தி வருகின்றனர்.

- இரா.சாந்தகுமார்

நம் நாட்டின் பொருளாதாரத்தை மேம்படுத்துவதின் ஒரு பகுதியாக 27 லட்சத்து 75 ஆயிரத்து 390 நிறுவனங்களை பெண் தொழில்முனைவோர்கள் நடத்துகின்றனர். சென்னைக்கு அருகே உள்ள பாக்ஸ்கான் தொழிற்சாலையில் பணிபுரியும் 41 ஆயிரம் பணியாளர்களில் 35 ஆயிரம் பணியாளர்கள் பெண்கள் என்பது குறிப்பிடத்தக்கது.

'காற்றில் ஏறி விண்ணையும் சாடுவோம்' என்பதற்கு ஏற்ப, இந்திய விமானிகளில் 5 சதவீதத்தினர் பெண்கள் ஆவர். இவ்வாறு வீட்டுக்காகவும், நாட்டுக்காகவும் தங்களை அர்ப்பணித்து வாழும் போற்றுதலுக்குரிய பெண்கள், பொதுவெளியில் அவ்வப்போது பாலியல் ரீதியாக துன்புறுத்தப்படுவது வேதனைக்குரியது.

பள்ளி, கல்லூரிகளில் பயிலும் மாணவிகளுக்கு ஆசிரியர்களால் பாலியல் தொல்லை, பணியிடங்களில் பாலியல் தொல்லை, கத்திமுனையில் பெண்களை மிரட்டி காதலிக்குமாறும், நட்புடன் பழகுமாறும் கட்டாயப்படுத்துவது, பணி முடிந்து வீடு திரும்பும் பெண் காவலருக்கு பாலியல் தொல்லை என பெண்களுக்கு எதிரான பாலியல் குற்றங்கள் பெருகுவதற்கான காரணங்கள் குறித்து ஆராய்ந்து தீர்வு காணப்பட வேண்டும்.

மூன்றரை வயதுப் பெண் குழந்தை பாலியல் வன்கொடுமை செய்யப்பட்டதற்கு அந்தக் குழந்தை குற்றம் சாட்டப்பட்டவரின் முகத்தில் காரி உமிழ்ந்ததுதான் காரணம் என மாவட்ட ஆட்சித் தலைவர் ஒருவரே பாலியல் குற்றவாளிக்கு ஆதரவாகப் பேசியிருப்பது கண்டிக்கத்தக்கது.