வாசகங்களுடன் 'டி-ஷர்ட்' அணிந்து வந்த திமுக எம்.பி.க்கள்

நாடாளுமன்ற இரு அவைகளும் ஒத்திவைப்பு

- 

புது தில்லி, மார்ச் 20: தொகுதி மறுசீரமைப்பு தொடர்பான வாசகங்களுடன் டி-ஷர்ட் அணிந்து வந்த திமுக மற்றும் கூட்டணி கட்சி எம்.பி.க்களால் நாடாளுமன்ற இரு அவைகளும் வியாழக்கிழமை நாள் முழுவதும் ஒத்திவைக்கப்பட்டன.

கடந்த மார்ச் 10-ஆம் தேதி தொடங்கி நடைபெற்றுவரும் பட்ஜெட் கூட்டத் தொடரின் இரண்டாவது அமர்வில் நாடாளுமன்றம் நாள் முழுவதும் ஒத்திவைக்கப்பட்டது. இதுவே முதல் முறையாகும். இரு அவைகளிலும் அமளி எதுவும் நிகழவில்லை; அதேநேரம், அடுத்தடுத்து சில நிமிஷங்களில் ஒத்திவைக்கப்பட்டன.

நாட்டில் மக்களவைத் தொகுதிகள் மறுசீரமைப்பு நடவடிக்கையை மக்கள்தொகை அடிப்படையில் மேற்கொள்ளக் கூடாது; இத்தகைய நடைமுறையால் மக்கள்தொகை கட்டுப்பாட்டில் பின்தங்கியுள்ள வட மாநிலங்களே பலனடையும். தென் மாநிலங்கள் பாதிக்கப்படும் என்று தமிழகம் உள்ளிட்ட தென்மாநிலங்கள் வலியுறுத்தி வருகின்றன. இது தொடர்பாக தமிழக அரசுக்கும் மத்திய அரசுக்கும் இடையே கருத்து மோதல் நீடித்து வருகிறது.

நாடாளுமன்ற பட்ஜெட் கூட்டத் தொடரின் 2-ஆம் கட்ட அமர்வில் தொகுதி மறுசீரமைப்பு விவகாரத்தை திமுக தொடர்ந்து எழுப்பி வருகிறது.