உயிருக்கு உலைவைக்கும் உடல் பருமன்

உலக அளவில் சுமார் 200 கோடி பெரியவர்கள் அதிகப்பருமனுடன் வாழ்கின்றனர்.

- ஐவி.நாகராஜன்

இது உலகளாவிய வயதுவந்தோர் மக்கள் தொகையில் கிட்டத்தட்ட 50 சதவீதம் ஆகும். வரிசைப்படி பார்த்தால் சீனா, இந்தியா, அமெரிக்கா, பிரேசில், ரஷியா, மெக்ஸிகோ, இந்தோனேசியா மற்றும் எகிப்து ஆகிய நாடுகளில் அதிக உடல் பருமனான பெரியவர்கள் உள்ளனர். சீனா (சுமார் 40 கோடி), இந்தியா (18 கோடி) மற்றும் அமெரிக்கா (17 கோடி) ஆகியவை முதல் மூன்றில் உள்ளன.

உடல் பருமனுக்கு வழிவகுக்கும் முதன்மையான காரணி இப்போதைய வாழ்க்கை முறை. அதாவது, உட்கார்ந்த இடத்திலேயே வேலை பார்க்கிறோம். ருசிக்காகச் சாப்பிடுகிறோம். பதப்படுத்தப்பட்ட உணவுகள், துரித உணவுகள், செயற்கைப் பானங்களை அருந்துகிறோம். அடிக்கடி ஹோட்டலில் சாப்பிடுகிறோம். மேலும் மன அழுத்தம், ஆரோக்கியமற்ற பழக்க வழக்கங்கள், மரபியல் மற்றும் சில மருந்துகள் போன்றவை உடல் பருமனுக்குக் காரணங்களாக இருக்கலாம். கர்ப்பம், கர்ப்ப காலத்தில் அதிகரித்த எடையைக் கண்டுகொள்ளாமல் விடுவதும் இறுதியில் உடல் பருமனுக்கு வழிவகுக்கிறது. போதுமான அளவு தூக்கம் இல்லையென்றால் ஹார்மோன் மாற்றங்களுக்கு வழிவகுக்கும். இது தொடர்ந்து பசி உணர்வுகளைத் தூண்டி சர்க்கரை, உப்பு, எண்ணெய் மற்றும் கலோரி அதிகமாக உள்ள உணவுகளைச் சாப்பிடத் தூண்டும்.