இளையராஜாவுக்கு பாரத ரத்னா விருது வழங்க வேண்டும்

இசைத்துறையில் பொன்விழா கண்டுள்ள இசையமைப்பாளர் இளையராஜாவுக்கு நாட்டின் உயரிய பாரத ரத்னா விருது வழங்க வேண்டுமென மத்திய அரசுக்கு முதல்வர் மு.க.ஸ்டாலின் வேண்டுகோள் விடுத்தார்.

- 

சென்னை, செப். 13:

சிம்பொனி சிகரம் தொட்ட தமிழன் இசைஞானி எனும் தலைப்பில் இளையராஜாவின் 50 ஆண்டு இசைப்பயணத்துக்கு தமிழக அரசின் சார்பில் சென்னையில் பாராட்டு விழா சனிக்கிழமை நடைபெற்றது. விழாவுக்குத் தலைமையேற்று முதல்வர் மு.க.ஸ்டாலின் பேசியது:

இசைஞானி கலைத்தாய்க்கு மட்டும் சொந்தமானவர் அல்லர். தமிழ்த்தாய்க்கும் சொந்தமானவர். அவரைப் பாராட்டுவதால் நாம்தான் பெருமை அடைகிறோம். அவர் தனது திரையுலகப் பயணத்தைத் தொடங்கி ஐம்பது ஆண்டுகள் ஆகிறது. அதாவது நம்முடைய இதயங்களை ஆளத்தொடங்கி அரை நூற்றாண்டு காலமாகிறது.