4 ஆண்டுகளாக அலைக்கழிக்கப்படும் தூய்மைக்காவலர்கள்!

கரோனா கால ஊக்கத்தொகை பெற முடியாமல், கடந்த 4 ஆண்டுகளாக தமிழகம் முழுவதும் 43 ஆயிரம் தூய்மைக் காவலர்கள் அலைக்கழிக்கப்பட்டு வருகின்றனர்.

- ஆ.நங்கையார்மணி

திண்டுக்கல், ஜூலை 16:

கடந்த 2020-ஆம் ஆண்டு கரோனா தீநுண்மி தொற்றுப் பரவல் ஏற்பட்டு, பொதுமுடக்கம் அமல்படுத்தப்பட்டது. இந்தக் கால கட்டத்தின் போது, பொது மக்களுக்குத் தேவையான அத்தியாவசியப் பணிகளை மேற்கொள்ளும் சுகாதாரத் துறை பணியாளர்கள், உள்ளாட்சி அமைப்புகளின் பணியாளர்கள் முன்களப் பணியாளர்களாக அறிவிக்கப்பட்டனர். முன்களப் பணியில் ஈடுபடும் ஊழியர்களுக்கு ஊக்க ஊதியம் வழங்கப்படும் என அரசு சார்பில் அறிவிக்கப்பட்டது. இதன்படி, மருத்துவப் பணியாளர்கள், நகர்ப்புற உள்ளாட்சிப் பணியாளர்கள் உள்ளிட்டோருக்கு ஊக்க ஊதியம் வழங்கப்பட்டது. ஆனால், ஊரக உள்ளாட்சிகளில் பணிபுரியும் தூய்மைக் காவலர்களுக்கு 4 ஆண்டுகளாகியும் கூட, கரோனா கால ஊக்க ஊதியம் கிடைக்காததால், ஏமாற்றம் அடைந்தனர்.

43 ஆயிரம் தூய்மைக் காவலர்கள்: கரோனா தீநுண்மி தொற்றுப் பரவல் காலத்தில் தூய்மைப் பணிகள் மட்டுமன்றி, கரோனா தொற்றால் பாதிக்கப்பட்டவர்கள் தங்கியிருந்த இடத்தை சுத்தம் செய்தல், கிருமி நாசினி தெளித்தல், உயிரிழந்தவர்களை அப்புறப்படுத்துதல் போன்ற பணிகளை தூய்மைக் காவலர்கள் மேற்கொண்டனர்.