அனில் அம்பானியின் நிறுவனம் மீதான 'கடன் மோசடி' அறிவிப்பு வாபஸ்

மும்பை உயர்நீதிமன்றத்தில் கனரா வங்கி தகவல்

- 

மும்பை, ஜூலை 10: தொழிலதிபர் அனில் அம்பானிக்குச் சொந்தமான ரிலையன்ஸ் கம்யூனிகேஷன்ஸ் நிறுவனத்தின் கடன் கணக்கை 'மோசடி' என வகைப்படுத்திய தனது அறிவிப்பைத் திரும்பப் பெற்றுக்கொள்வதாக மும்பை உயர்நீதிமன்றத்தில் கனரா வங்கி வியாழக்கிழமை தெரிவித்தது.

இதைத்தொடர்ந்து, உயர்நீதிமன்ற நீதிபதிகள் ரேவதி மோஹிதே டேரே, நீலா கோகலே ஆகியோர் அடங்கிய அமர்வு, இதுதொடர்பான அனில் அம்பானியின் மனுவை முடித்து வைத்து உத்தரவிட்டனர். இந்தத் தகவலை ரிசர்வ் வங்கிக்குத் தெரிவிக்க வேண்டும் என்றும் கனரா வங்கிக்கு நீதிபதிகள் அறிவுறுத்தினர்.

ரிலையன்ஸ் கம்யூனிகேஷன்ஸ் நிறுவனம் திவாலானதாக அறிவிக்கப்பட்டு, கடந்த 2019-ஆம் ஆண்டு ஜூன் முதல் தீர்வு செயல்முறையில் (சிஐஆர்பி) ஈடுபட்டுள்ளது.