குடியரசுத் தலைவர், ஆளுநருக்கு காலக்கெடு இல்லை

மசோதா ஒப்புதல் விவகாரத்தில் உச்சநீதிமன்றம் விளக்கம்

- நமது நிருபர்

மாநில சட்டப்பேரவைகள் நிறைவேற்றும் மசோதாக்கள் மீது முடிவெடுக்க மாநில ஆளுநர்கள் மற்றும் குடியரசுத் தலைவருக்கு நீதித் துறை காலக்கெடு நிர்ணயிப்பது பொருத்தமற்றது என்று உச்சநீதிமன்ற அரசியல் சாசன அமர்வு வியாழக்கிழமை விளக்கமளித்தது.

அதேசமயம், மசோதாக்கள் மீது 'நிரந்தரமாக' முடிவெடுக்காமல் அப்படியே வைத்திருக்கும் 'கட்டுப்பாடற்ற' அதிகாரங்கள் ஆளுநருக்கு இல்லை என்று அரசியல் சாசன அமர்வு தெளிவுபடுத்தியது.

தமிழக அரசு அனுப்பிய 10 மசோதாக்கள் மீது ஆளுநர் குறிப்பிட்ட காலவரம்புக்குள் முடிவு எடுக்க உத்தரவிடக் கோரி தமிழக அரசு உச்சநீதிமன்றத்தில் தொடுத்த வழக்கில் நீதிபதிகள் ஜே.பி. பார்திவாலா, ஆர். மகாதேவன் ஆகியோர் அடங்கிய அமர்வு கடந்த ஏப்ரல் 8-ஆம் தேதி தீர்ப்பளித்தது.

அதில், மசோதாக்கள் மீது உரிய முடிவெடுக்காமல் ஆளுநர் காலம் தாழ்த்தியது சட்டவிரோதம்; அரசமைப்பின் 142-ஆவது பிரிவு அளித்துள்ள சிறப்பு அதிகாரத்தின்படி, தாமதிக்கப்பட்ட மசோதாக்கள் நிறைவேறியதாக கருதப்படும். பேரவை நிறைவேற்றி அனுப்பும் மசோதாக்கள் மீது ஆளுநர், குடியரசுத் தலைவர் ஒட்டுமொத்தமாக ஒன்று முதல் மூன்று மாதங்களுக்குள் முடிவெடுக்க வேண்டும் என்று நீதிபதிகள் குறிப்பிட்டனர்.

111 பக்க விளக்கம்: இந்தத் தீர்ப்பு குறித்து 14 கேள்விகளை குடியரசுத் தலைவர் திரௌபதி முர்மு எழுப்பினார். அதுகுறித்து உச்சநீதிமன்றத் தலைமை நீதிபதி பி.ஆர். கவாய், நீதிபதிகள் சூர்யகாந்த், விக்ரம் நாத், பி.எஸ்.நரசிம்மா, அதுல் எஸ்.சந்துர்கர் அடங்கிய அரசியல் சாசன அமர்வு விசாரித்து ஒருமனதாக வியாழக்கிழமை விளக்கமளித்தது. 111 பக்கங்கள் கொண்ட விளக்கத்தின் முக்கிய அம்சங்கள்: மசோதாக்கள் விவகாரத்தில் முடிவெடுக்க ஆளுநருக்கு மூன்று தேர்வுகள் உள்ளன. முதலாவதாக, மசோதாவுக்கு அவர் ஒப்புதல் அளிக்கலாம். இரண்டாவதாக, அதை குடியரசுத் தலைவருக்கு அனுப்பலாம். மூன்றாவதாக, அரசமைப்பின் 200-ஆவது பிரிவின்படி மசோதாவை நிறுத்தி வைத்து, அதை பேரவையின் மறு ஆய்வுக்கே திருப்பி அனுப்பலாம்.