முதல் பெண்ணாக ஆசை

காஷ்மீரைச் சேர்ந்த பத்து வயதாகும் அதீகா மிர். 'ஃபார்முலா 1' (எஃப் 1) அகாதெமியின் 'டிஸ்கவர் யுவர் டிரைவ்' திட்டத்துக்கு உலகளவில் தேர்ந்தெடுக்கப்பட்ட மூன்று பெண்களில் ஒருவர், இதுவரை இப்படித் தேர்ந்தெடுக்கப்பட்டவர்களில் வயது குறைந்தவரும் இவர்தான்.

- -பிஸ்மி பரிணாமன்

அதீகா மிர் சொல்வது:

"கார்டிங் என்பது மோட்டார் பந்தயத்தில் ஒரு பகுதியாகும். 'கார்ட்ஸ்' எனப்படும் சிறிய, திறந்த குட்டி கார்களை அதற்கான பந்தயத் தடங்களில் வேகமாக ஓட்டுவதாகும். கார் ரேஸில் கார்ட்ஸூக்கு முக்கியப் பங்கு உண்டு. பல தொழில்முறை ஓட்டுநர்களுக்கு 'கார்ட்ஸ்' ஒரு தொடக்கப் புள்ளியாகும். இதில் எனக்கு நல்ல அனுபவம் உண்டு. இது ஆண்களுக்கான விளையாட்டு. ஃபார்முலா 1' -இல் போட்டியிடும் 21-ஆம் நூற்றாண்டின் முதல் பெண்ணாக நான் இருக்க விரும்புகிறேன். அதுதான் என் லட்சியம். அதற்கு ஒவ்வொரு நாளும் நான் கடினமாக உழைக்க வேண்டும். அதைத்தான் செய்து வருகிறேன்.

ஃஃபார்முலா 1' வரலாற்றில் இரண்டு பெண்கள் மட்டுமே கிராண்ட் பிரிக்ஸில் பங்கு பெற்றுள்ளனர். 1992 - ஆம் ஆண்டு முதல் எந்தப் பெண்ணும் தகுதி பெற முயற்சிக்கவில்லை. இந்தப் பின்னணியில், கார்ட்டிங் பிரிவில் நான் பங்கு பெறுகிறேன். கார்டிங் ஒரு கலப்பு - பாலினப் போட்டி. சிறுவர்களும் சிறுமிகளும் ஒன்றாகக் கருதப்படுவார்கள். ஆனால், நான் மிகவும் வேகமாக குட்டி காரை ஓட்டுவதால், சிறுவர்கள் என்னை முந்த என்னை முட்டுவது போல ஓட்டுவார்கள். சிறுவர்களிடம் 'சிறுமி நம்மை முந்துவதா' என்ற ஈகோ பிரச்னை இருக்கிறது.