பிகாரில் ஆற்றில் மூழ்கி 5 பேர் உயிரிழப்பு

பல்வேறு மாநிலங்களில் மழை-வெள்ளம்

- 

பூர்னியா, ஆக. 23: பிகாரின் பூர்னியா மாவட்டத்தில் ஒரே குடும்பத்தைச் சேர்ந்த ஐந்து பேர் ஆற்றில் மூழ்கி உயிரிழந்த சம்பவம் அப்பகுதியில் சோகத்தை ஏற்படுத்தியுள்ளது.

பூர்னியா மாவட்டத்தின் கஸ்பா பகுதியில் உள்ள கரிகோசி ஆற்றில் கடந்த வெள்ளிக்கிழமை மாலை இந்தச் சம்பவம் நேரிட்டது. ஒன்பது வயது சிறுமி கௌரி குமாரி வழுக்கி விழுந்து, ஆற்றின் பலத்த நீரோட்டத்தில் அடித்துச் செல்லப்பட்டார். இதைப் பார்த்த அவரது அத்தை சுலோச்சனா தேவி (30), சிறுமியைக் காப்பாற்ற ஆற்றில் குதித்தார்.

இருவரையும் காப்பாற்றுவதற்காக அடுத்தடுத்து ஆற்றில் குதித்த மற்ற குடும்ப உறுப்பினர்களும் நீரில் மூழ்கி உயிரிழந்தனர். அவர்கள் சேகர் குமார் (21), கரண் குமார் (21) மற்றும் சச்சின் குமார் (18) என அடையாளம் காணப்பட்டுள்ளனர். உள்ளூர் மக்களின் உதவியுடன் உடல்கள் மீட்கப்பட்டதாக மாவட்ட ஆட்சியர் அன்ஷுல் குமார் தெரிவித்தார்.

ஜார்க்கண்டில்... பலத்த மழை காரணமாக ஜார்க்கண்ட் மாநிலத்தில் ஐந்து பேர் உயிரிழந்தனர்; ஒருவரை காணவில்லை. செராய் கேலா-கர்சவான் மாவட்டத்தில் வீடு இடிந்து விழுந்ததில் தாய்-மகன் இறந்தனர். அதே மாவட்டத்தில், சுவர் இடிந்து விழுந்ததில் ஒரு சிறுவன் உயிரிழந்தான். சத்ராவில் ஆற்றில் ஏற்பட்ட திடீர் வெள்ளத்தில் ஒரு தம்பதி அடித்துச் செல்லப்பட்டனர். இதில் கணவரின் உடல் மீட்கப்பட்டது. மனைவியைத் தேடும் பணி நடைபெற்று வருகிறது.

மாநிலத்தில் திங்கள்கிழமை வரை பலத்த மழை பெய்யும் என்று வானிலை மையம் எச்சரித்துள்ளது. ஏற்கெனவே தொடர் மழையால் மாநிலம் முழுவதும் பரவலாக மரங்கள், மின் கம்பங்கள் சரிந்தன. வீடுகள் சேதமடைந்தன.

ஜார்க்கண்ட் மாநிலம், ராஞ்சியில் ஸ்வர்ணரேகா நதியில் ஏற்பட்ட வெள்ளப்பெருக்கு. தன. சாலைகள் மற்றும் வயல்கள் வெள்ளத்தில் மூழ்கியுள்ளன.

ஜம்மு-காஷ்மீர்: ஜம்மு-காஷ்மீரின் ரியாசி, கதுவா மாவட்டங்களில் மழை தொடர்பான இரு அசம்பாவித சம்பவங்களில் 2 பேர் உயிரிழந்தனர்.