தொழில் முதலீடுகள்: அரசு வெள்ளை அறிக்கை வெளியிட வேண்டும்

எடப்பாடி பழனிசாமி வலியுறுத்தல்

- 

திருப்பரங்குன்றம், செப். 1: தமிழகத்துக்கு கிடைத்த தொழில் முதலீடுகள் குறித்து திமுக அரசு வெள்ளை அறிக்கை வெளியிட வேண்டும் என அதிமுக பொதுச் செயலரும், சட்டப்பேரவை எதிர்கட்சித் தலைவருமான எடப்பாடி கே. பழனிசாமி வலியுறுத்தினார்.

'மக்களைக் காப்போம், தமிழகத்தை மீட்போம்' பயணத்தின் ஒரு பகுதியாக திருப்பரங்குன்றம் 16 கால் மண்டபம் அருகே திங்கள்கிழமை மாலை எடப்பாடி பழனிசாமி பேசியதாவது:

தற்போது வெளிநாடு சென்றுள்ள தமிழக முதல்வர், அங்கிருந்து புதிய முதலீடுகளை ஈட்டி வர வேண்டும். முதல்வர் நான்கு முறை வெளிநாடு பயணம் மேற்கொண்ட நிலையில், தமிழகத்துக்கு புதிய தொழில் முதலீடுகள் எதுவும் வந்ததாகத் தெரியவில்லை. இதுவரை எவ்வளவு தொழில் முதலீடுகள் ஈட்டி வரப்பட்டன, எவ்வளவு நிறுவனங்கள் தொடங்கப்பட்டன. இவற்றின் மூலம், எவ்வளவு பேர் வேலைவாய்ப்பு பெற்றனர் என்பது குறித்து வெள்ளை அறிக்கை வெளியிட வேண்டும்.

கடந்த 31-ஆம் தேதி டிஜிபி ஓய்வு பெற்ற நிலையில், அந்தப் பதவிக்கு முன்னுரிமை அடிப்படையில் ஏற்கெனவே 8 பேர் இருக்கும் நிலையில், 9 ஆவதாக இருக்கக்கூடியவரை பொறுப்பு டிஜிபியாக தமிழக அரசு நியமித்தது.

ஏற்கெனவே, தமிழகத்தில் சட்டம்-ஒழுங்கு சீர்குலைந்துள்ள நிலையில், மூன்று மாதங்களுக்கு முன்பே டிஜிபி குறித்து நடவடிக்கை எடுக்க வேண்டிய தமிழக அரசு செயல்படாத அரசாக இருக்கிறது. 'உங்களுடன் ஸ்டாலின்' என்ற திட்டம் மூலம் வீடு வீடாகச் சென்று 46 பிரச்னைகள் குறித்து துண்டுச் சீட்டுகள் கொடுக்கின்றனர். மக்களுக்கு 46 பிரச்னைகள் இருப்பதாகக் கண்டுபிடித்ததே முதல்வரின் நான்காண்டு கால சாதனையாகும்.