உக்ரைன் போரை நிறுத்துமா டிரம்ப்பின் முடிவு?

உக்ரைன் விவகாரத்தில் ஒரு மிக முக்கிய முடிவை எடுக்கவிருக்கிறேன். அது, ரஷியா மீதான கடுமையான பொருளாதாரத் தடையாகவோ, கூடுதல் வரி விதிப்புகளாகவோ, அல்லது இரண்டுமாகவோ இருக்கலாம். இல்லையென்றால், இது உங்கள் சண்டை என்று கூறிவிட்டு எதுவுமே செய்யாமல் விட்டுவிடலாம். அமெரிக்க அதிபர் டிரம்ப் கூறியது இது.

- 

அலாஸ்காவில் ரஷிய அதிபர் விளாதிமீர் புதினையும், அதனைத் தொடர்ந்து வெள்ளை மாளிகையில் உக்ரைன் அதிபர் வொலோதிமீர் ஸெலென்ஸ்கியையும் நேரில் சந்தித்துப் பேச்சுவார்த்தை நடத்திய பிறகும் இந்த விவகாரத்தில் கண்ணுக்கெட்டிய தொலைவு வரை எந்தத் தீர்வும் எட்டாத விரக்தியில் அமெரிக்க அதிபர் டொனால்ட் டிரம்ப் சனிக்கிழமை கூறியது இது.

அமைதியை ஏற்படுத்துவதற்காக உக்ரைன் தனது பகுதிகளை விட்டுத் தர வேண்டும் என்று கேட்கும் அளவுக்கு அவர் இறங்கி வந்துவிட்டார். புதினை திருப்திப்படுத்தும் வகையில், உக்ரைனுக்கு நேட்டோவில் இடம் கிடையாது என்றும் அவர் கறாராகக் கூறிவிட்டார். ஆனால் இத்தனைக்குப் பிறகும் போர் நிறுத்த ஒப்பந்தம் என்பது எட்டாக் கனியாகவே உள்ளது.

கிழக்கு உக்ரைனின் டொனெட்ஸ்க், லுஹான்ஸ்க், ஸபோரிஷியா, கெர்சான் ஆகிய நான்கு மாகாணங்களில் இன்னும் அரசுப் படையினரின் கட்டுப்பாட்டில் உள்ள பகுதிகளைக் கைப்பற்றுவது, உக்ரைனை ராணுவ வலிமையற்றதாக்குவது உள்ளிட்ட தங்களது இலக்குகளை அடையும் வரை போர் தொடரும் என்று ரஷியா திட்டவட்டமாகக் கூறிவருகிறது. இந்த நிலையில், இப்போது இருக்கும் கட்டுப்பாட்டு எல்லைகளை நீடிக்கும் வகையிலான ஓர் ஒப்பந்தத்துக்கு அந்த நாடு சம்மதிக்குமா என்பது சந்தேகமே.