ஓரணியில் தமிழ்நாடு: ஓடிபி விவகாரம் ஆதார் விவரங்களை சேகரிக்கவில்லை என திமுக உறுதியளிக்க உயர்நீதிமன்றம் உத்தரவு

"ஓரணியில் தமிழ்நாடு" என்ற புதிய உறுப்பினர் சேர்க்கை இயக்கத்தில் வாக்காளர்களிடமிருந்து ஆதார் விவரங்களைப் பெறவில்லை என்பதை உறுதி செய்து திமுக எழுத்துப்பூர்வமாக உறுதியளிக்க வேண்டும் என சென்னை உயர்நீதிமன்ற மதுரை அமர்வு வியாழக்கிழமை உத்தரவிட்டது.

- 

மதுரை, ஆக. 14:

சிவகங்கை மாவட்டம், திருப்புவனத்தைச் சேர்ந்த ராஜ்குமார் சென்னை உயர்நீதிமன்ற மதுரை அமர்வில் தாக்கல் செய்த மனு: "ஓரணியில் தமிழ்நாடு" என்ற பெயரில் நடைபெறும் உறுப்பினர் சேர்க்கையில், திமுகவினர் சட்டவிரோதமாக பொதுமக்களின் ஆதார் எண், வாக்காளர் அடையாள அட்டை விவரம், கைப்பேசி எண் ஆகியவற்றைச் சேகரிக்கின்றனர். பிறகு, அவர்களின் கைப்பேசிக்கு ஒரு முறை கடவுச் சொல் எண் வருகிறது. அந்தக் கடவுச் சொல் எண்ணை பொதுமக்கள் தெரிவித்ததும், அவர்கள் திமுகவில் உறுப்பினராகச் சேர்ந்ததாகத் தகவல் வருகிறது.

இந்த நடைமுறையில் வாக்காளர்கள் தங்களது கைப்பேசிக்கு வரும் ஒருமுறை கடவுச் சொல் எண்ணை தெரிவிக்கக் கட்டாயப்படுத்தப்படுகின்றனர். கடவுச் சொல் எண்ணை தெரிவிக்காதவர்களுக்கு அரசின் நலத்திட்ட உதவிகள் கிடைக்காது என மிரட்டப்படுகின்றனர்.