கைதான மேயரின் கணவர் மருத்துவமனையில் அனுமதி

மதுரை மாநகராட்சி சொத்து வரி முறைகேடு

- 

மதுரை, ஆக. 13: மதுரை மாநகராட்சி சொத்து வரி விதிப்பு முறைகேடு தொடர்பாக கைது செய்யப்பட்ட மேயர் வ. இந்திராணியின் கணவர் பொன். வசந்த் அரசு ராஜாஜி மருத்துவமனையில் சிகிச்சைக்காக புதன்கிழமை அனுமதிக்கப்பட்டார்.

மதுரை மாநகராட்சியில் வணிக வளாகங்கள், திருமண மண்டபங்கள், திரையரங்குகள் உள்ளிட்டவற்றுக்கு நிர்ணயிக்கப்பட்ட வரியைவிடக் குறைந்த அளவிலான வரி விதிக்கப்பட்டதாகப் புகார் எழுந்தது. இது தொடர்பான விசாரணையில் ரூ. 150 கோடி மாநகராட்சிக்கு வருவாய் இழப்பு ஏற்பட்டது தெரியவந்தது.

இதையடுத்து, அப்போதைய மாநகராட்சி ஆணையராகப் பணியாற்றிய ச. தினேஷ்குமார் அளித்த புகாரின் பேரில், மத்திய குற்றப் பிரிவு போலீஸார் வழக்குப் பதிந்து, வரி விதிப்பு முறைகேட்டில் தொடர்புடைய ஓய்வு பெற்ற உதவி ஆணையர், உதவி வருவாய் அலுவலர் உள்ளிட்ட 13 பேரைக் கைது செய்தனர்.