வரைவுப் பட்டியல்: நீக்கப்பட்டவர்களின் பெயர்களை வெளியிடத் தேவையில்லை

உச்சநீதிமன்றத்தில் தேர்தல் ஆணையம்

- 

புது தில்லி, ஆக.10: 'முன்னறிவிப்பின்றி பிகார் வரைவு வாக்காளர் பட்டியலில் இருந்து எந்தவொரு வாக்காளரின் பெயரும் நீக்கப்படாது; அதேவேளையில் நீக்கப்பட்டவர்களின் பெயர்களை வெளியிட வேண்டிய அவசியம் இல்லை' என உச்சநீதிமன்றத்தில் இந்திய தேர்தல் ஆணையம் தெரிவித்தது.

மேலும், இந்த விவகாரத்தில் சம்பந்தப்பட்ட வாக்காளரிடம் உரிய விளக்கம் கோரப்பட்ட பிறகே எந்தவொரு உத்தரவும் பிறப்பிக்கப்படும் எனவும் தேர்தல் ஆணையம் தெரிவித்தது.

எதிர்க்கட்சிகளின் கடும் எதிர்ப்புக்கு மத்தியில் பிகாரில் வரைவு வாக்காளர் பட்டியல் தயாரிக்கும் பணியை நிறைவு செய்து கடந்த ஆக.1-ஆம் தேதி தேர்தல் ஆணையம் வெளியிட்டது. அதில் பிகாரில் 7.24 கோடி வாக்காளர்கள் உள்ளதாகவும் இறப்பு, புலம்பெயர்வு உள்ளிட்ட பல்வேறு காரணங்களால் 65 லட்சம் வாக்காளர்களின் பெயர்களை நீக்கியதாகவும் தேர்தல் ஆணையம் தெரிவித்தது.

இதைத் தொடர்ந்து, செப். 30-ஆம் தேதி இறுதி வாக்காளர் பட்டியலை வெளியிட தேர்தல் ஆணையம் திட்டமிட்டுள்ளது.

இதனிடையே, பிகாரில் சிறப்பு தீவிர திருத்தம் நடவடிக்கை மேற்கொண்டதற்கு எதிராக ஜனநாயக சீர்த்திருத்தத்துக்கான சங்கம் (ஏடிஆர்) உள்பட பலர் உச்சநீதிமன்றத்தில் மனு தாக்கல் செய்தனர்.