சமூகப் பாதுகாப்பும் கடமையும்...

செர்பிய நாட்டில் இயங்கும் நம்பியோ தரவுத் தளம் (நம்பியோ சேஃப்டி இன்டெக்ஸ்) அதன் பயனாளர்கள் அளித்த தரவுகளைப் பயன்படுத்தி குற்ற விகிதங்கள், பொதுப் பாதுகாப்பு பற்றிய கருத்துகள், சமூக காவல், பணியில் உள்ள சவால்கள், தனிப்பட்ட பாதுகாப்பு தகவல்கள் உள்ளிட்ட பல்வேறு காரணிகளைப் பயன்படுத்தி உலகின் பாதுகாப்பான நாடுகள் உள்ள பட்டியலை தரவரிசையில் வெளியிட்டுள்ளது.

- இரா.சாந்தகுமார்

147 நாடுகள் அடங்கிய இந்த தர வரிசையில், இந்தியா 55.7 புள்ளிகளுடன் 66-ஆவது இடத்தில் உள்ளது. ஆச்சரியப்படுத்தும் விதத்தில் ஸ்பெயின் மற்றும் பிரான்ஸுக்கு இடையில் அமைந்துள்ள மிக மிகச் சிறிய நாடான அண்டோரா முதலிடத்தில் உள்ளது. இந்த நாட்டின் மக்கள்தொகை சுமார் 83 ஆயிரம் மட்டுமே. ஐரோப்பாவில் உள்ள வளமான நாடுகளில் இந்த நாடு 13-ஆவது இடத்தில் உள்ளது.

அண்டோரா, ஐக்கிய அரபு அமீரகம், கத்தார், தைவான், ஓமன், ஐல் ஆஃப் மேன் (ஐரிஷ் கடல் தீவு) ஹாங்காங், ஆர்மீனியா, சிங்கப்பூர், ஜப்பான் ஆகிய நாடுகள் உலகின் பாதுகாப்பான நாடுகளின் பட்டியலில் முதல் 10 இடங்களில் உள்ள நாடுகளாகும். இவை அனைத்தும் பரப்பளவில் மிகக் குறைந்தவை. இதைப் பார்க்கும்போது மிகச் சிறிய நாடுகளில் மக்களின் பாதுகாப்பை உறுதி செய்வது எளிதெனத் தோன்றலாம்.

எனினும், மோசமான பாதுகாப்பற்ற நாடுகளின் பட்டியலிலும் மிகச் சிறிய நாடுகளான வெனிசுலா, பப்புவா நியூ கினியா, ஹோண்டுராஸ், ஜமைக்கா ஆகிய நாடுகள் உள்ளன. எனவே, ஒரு நாட்டின் பரப்பளவுக்கும் அந்த நாட்டில் நிலவும் பாதுகாப்புத் தன்மைக்கும் தொடர்பு இல்லை என்று எண்ணத் தோன்றுகிறது.

உலக வல்லரசு நாடுகளான அமெரிக்கா, பிரிட்டன் ஆகியவை பாதுகாப்பான நாடுகளின் பட்டியலில் முறையே 89 மற்றும் 87-ஆவது இடங்களில் உள்ளன. இதன் மூலம் ராணுவ வலிமை மற்றும் செல்வச் செழிப்பு ஆகியன மிகுந்திருக்கும் நாடாயினும், அந்த நாடு மக்களின் பாதுகாப்புக்கு உகந்த நாடாக இருக்கும் என்பதற்கு உத்தரவாதமில்லை.