இராக் வணிக வளாகத்தில் தீ: 61 பேர் உயிரிழப்பு

இராக்கின் கிழக்குப் பகுதியிலுள்ள வணிக வளாகம் ஒன்றில் ஏற்பட்ட தீ விபத்தில் சிறுவர்கள் உள்பட 61 பேர் உயிரிழந்தனர்.

- 

பாக்தாத், ஜூலை 17:

இது குறித்து அந்த நாட்டு உள்துறை அமைச்சகம் வெளியிட்ட அறிக்கையில் தெரிவிக்கப்பட்டது:

வாசித் மாகாணம், அல்-குட் நகரிலுள்ள கார்னிஷ் ஹைப்பர் மார்க்கெட் மால் என்ற வணிக வளாகத்தில் புதன்கிழமை இரவு தீ விபத்து ஏற்பட்டது. இதில் சிறுவர்கள் உள்பட 61 பேர் உயிரிழந்தனர். அவர்களில் பெரும்பாலானோர் மூச்சுத்திணறல் காரணமாக உயிரிழந்தனர். இறந்தவர்களில் 14 பேரின் உடல்கள் எரிந்த நிலையில் அடையாளம் காணப்படவில்லை.

இது தவிர, சம்பவ இடத்தில் இருந்து 45-க்கும் மேற்பட்டவர்களை சிவில் பாதுகாப்புக் குழுவினர் பாதுகாப்பாக மீட்டனர் என்று அந்த அறிக்கையில் தெரிவிக்கப்பட்டது.

இந்த தீ விபத்தில் மேலும் பலரை காணவில்லை என்று அரசுக்குச் சொந்தமான இராக்கி செய்தி நிறுவனம் தெரிவித்தது.