திருப்பரங்குன்றம் மலை தூணில் தீபமேற்ற வேண்டும்

தனி நீதிபதியின் உத்தரவை உறுதி செய்தது இரு நீதிபதிகள் அமர்வு

- 

திருப்பரங்குன்றம் மலை உச்சியில் உள்ள தூணில் கார்த்திகை தீபம் ஏற்ற வேண்டுமென தனி நீதிபதி ஏற்கெனவே பிறப்பித்த உத்தரவை உறுதி செய்து, சென்னை உயர்நீதிமன்ற மதுரை அமர்வின் இரு நீதிபதிகள் செவ்வாய்க்கிழமை உத்தரவிட்டனர்.

திருப்பரங்குன்றம் மலை உச்சியில் உள்ள தூணில் கார்த்திகை தீபம் ஏற்ற உத்தரவிடக் கோரி, மதுரை எழுமலையைச் சேர்ந்த ராம. ரவிக்குமார் சென்னை உயர் நீதிமன்ற மதுரை அமர்வில் வழக்குத் தொடுத்தார்.

இந்த வழக்கை விசாரணைக்கு ஏற்ற உயர்நீதிமன்ற நீதிபதி ஜி.ஆர். சுவாமிநாதன், திருப்பரங்குன்றம் மலைக்கு நேரில் சென்று ஆய்வு மேற்கொண்டார். பிறகு, இந்த விவகாரம் தொடர்பாக வக்ஃப் வாரியம், கோயில் நிர்வாகம் தரப்பில் மனு தாக்கல் செய்ய நீதிபதி உத்தரவிட்டார்.

இதையடுத்து, கோயில் நிர்வாகம், தர்கா நிர்வாகம், மனுதாரர் தரப்பு வாதங்களைக் கேட்டறிந்த நீதிபதி ஜி.ஆர். சுவாமிநாதன், திருப்பரங்குன்றம் மலை உச்சியில் உள்ள தூணில் கார்த்திகை தீபத் திருநாளில் (2025-ஆம் ஆண்டு டிச. 3) தீபம் ஏற்ற வேண்டும் என கடந்த டிச. 1-ஆம் தேதி உத்தரவிட்டார்.