அமெரிக்காவில் மூன்றாவது கட்சி

இந்தியாவில் அரசியல் கட்சி தொடங்கப்படுவது என்பது புதிதல்ல. மாதத்துக்கு 4 கட்சிகள் வீதம் தேர்தல் ஆணையத்தில் பதிவு செய்யப்படுகின்றன. குறிப்பிட்ட கால இடைவெளியில் தேர்தல் ஆணையம் ஆய்வு செய்து செயல்படாத கட்சிகளை ரத்து செய்கிறது. இது இந்திய ஜனநாயகத்தின் ஓர் அம்சமாக திகழ்கிறது.

- சு.வெங்கடேஸ்வரன்

உலகின் மிகப் பழைமையான ஜனநாயக நாடான அமெரிக்காவில், உலகின் மிகப் பெரிய பணக்காரர்களில் ஒருவருமான எலான் மஸ்க் தொடங்கியுள்ள கட்சி அந்த நாட்டையும் தாண்டி பேசு பொருளாகியுள்ளது. ஏனெனில், அமெரிக்காவில் தனிநபர் ஒருவர் திடீரென அரசியல் கட்சியைத் தொடங்குவது என்பது மிகவும் அசாதாரண நிகழ்வு. அதுவும் யாருக்காக முழுமூச்சுடன் தேர்தல் பிரசாரம் செய்து அதிபர் பதவியில் அமரவைத்தாரோ, அதே டொனால்ட் டிரம்ப்பின் கொள்கைகளை விமர்சித்து 'அமெரிக்கா கட்சி' என்ற புதிய கட்சியை அறிவித்துள்ளார் எலான் மஸ்க்.

அமெரிக்காவை டிரம்ப் கடனில் தள்ளுகிறார் என்றும் அமெரிக்காவில் இப்போதுள்ள ஒற்றைக் கட்சி ஆட்சி முறை ஜனநாயகமே அல்ல என்பதும் மஸ்கின் வாதம். அனைவரும் கட்சி தொடங்கிய பிறகு தான் பொதுமக்களிடம் வாக்கு கேட்டுச் செல்வார்கள். ஆனால், மஸ்க் கட்சி தொடங்குவதா, வேண்டாமா என்பதையே எக்ஸ் வலைதளத்தில் தன்னைப் பின்தொடர்வோரிடம் வாக்கெடுப்பு நடத்தி முடிவு செய்தார். எலான் மஸ்கை எக்ஸ் வலைதளத்தில் 22 கோடிக்கும் அதிகமானோர் பின்தொடர்கிறார்கள்; இதில் 65 சதவீதத்துக்கும் மேற்பட்டோர் புதிய கட்சி தொடங்க ஆதரவு தெரிவித்துள்ளனர்.

அமெரிக்க வரலாற்றில் குடியரசுக் கட்சி, ஜனநாயக கட்சியைத் தவிர வேறு பிற கட்சிகளைச் சேர்ந்தவர்கள் அதிபராவது என்பது மிகவும் அரிதான நிகழ்வாகும். அந்த அளவுக்கு அந்த இரு கட்சிகளும் அமெரிக்க அரசியலில் ஆதிக்கம் செலுத்தி வருகின்றன. அவ்விரு கட்சிகளின் சித்தாந்தங்களைத் தவிர வேறு எந்தக் கொள்கைகளும் அமெரிக்க மக்களை பெரிதாக ஈர்க்கவில்லை.