காவல் நிலையங்களில் பாதுகாப்பின்றி பாழாகும் வாகனங்கள்

பல்வேறு குற்ற வழக்குகளில் போலீஸாரால் பறிமுதல் செய்யப்பட்ட வாகனங்கள் மழையிலும், கடும் வெயிலிலும், காவல் நிலைய வளாகத்தில் பாதுகாப்பின்றி நிறுத்தப்பட்டு வீணாவதை தடுக்க தேவையான நடவடிக்கைகளை எடுக்க வேண்டும் என சமூக ஆர்வலர்கள் எதிர்பார்க்கின்றனர்.

- நமது நிருபர்

நமது நிருபர் பெரம்பலூர், ஜூலை 13:

பெரம்பலூர் மாவட்டத்தில் போலீஸாரின் வாகனத் தணிக்கையின்போது மதுஅருந்தி வாகனம் ஓட்டுவோரின் வாகனங்கள், உரிய ஆவணங்களின்றி, போக்குவரத்து விதிமுறைகளை மீறிச் செல்லும் வாகனங்கள், சாலை விபத்துகளில் சிக்கி சேதமடைந்த வாகனங்கள், கடத்தல் தொழிலுக்குப் பயன்படுத்திய வாகனங்கள் என பல்வேறு குற்ற வழக்குகளில் தொடர்புடைய வாகனங்களை போலீஸார் கைப்பற்றி, காவல் நிலையத்துக்கு எடுத்துச் செல்கின்றனர். மேலும், மோட்டார் வாகன ஆய்வாளர்கள் வாகனத் தணிக்கையின்போது கைப்பற்றப்படும் வாகனங்களும் காவல் நிலையத்தில் ஒப்படைக்கப்படுகின்றன.

இட நெருக்கடி: இதுபோன்ற வாகனங்கள் காவல் நிலையங்களில் நிறுத்தப்படுவதால், அங்கு பணிபுரியும் காவல்துறையினரின் வாகனங்களை நிறுத்த இடம் இல்லாததால், காவல் நிலையத்துக் குள் கடும் இட நெருக்கடி ஏற்பட்டுள்ளது. இதனால், அங்கு பணிபுரியும் காவலர்கள் தங்களது வாகனங்களை சாலையோரங்களில் நிறுத்துவதால் போக்குவரத்துக்கு இடையூறு ஏற்படுகிறது.