நீலகிரி: கிடப்பில் போடப்பட்ட நிலத்தடி கேபிள்

மலை மாவட்டமான நீலகிரி மாவட்டத்தில் கடந்த 20 ஆண்டுகளுக்கு மேலாக நிலத்தடி கேபிள் மின் விநியோக திட்டம் கிடப்பில் போடப்பட்டுள்ளது.

- ஜான்சன் சி குமார்

உதகை, ஆக.24:

நீலகிரி மாவட்டத்தில் உள்ள குந்தா, எமரால்டு, பைக்காரா, சிங்காரா உள்ளிட்ட பகுதிகளில் உள்ள நீர் மின் நிலையங்களில் உற்பத்தி செய்யப்படும் மின்சாரம், பெரும்பாலும் வனப் பகுதிகளின் வழியாக மின் கம்பங்கள் நிறுவப்பட்டு மின் விநியோகம் செய்யப்பட்டு வருகிறது.

நீலகிரி மாவட்டத்தில் தென் மேற்கு மற்றும் வடகிழக்கு பருவமழைக் காலங்களில் காற்றுடன் பலத்த மழை பெய்வது வழக்கம். இதன் காரணமாக ஆங்காங்கே மின் கம்பங்கள் மீது மரங்கள் விழுந்து, மின் கம்பிகள் அறுந்து வனப் பகுதியில் கிடப்பதால் யானை, கரடி, சிறுத்தை என வன உயிர்கள் உயிரிழப்பு ஏற்படுவதும் வாடிக்கையாக உள்ளது.

மேலும் குடிநீருக்காக அணை களில் இருந்து மின் மோட்டார் மூலம் தண்ணீரை பம்ப் செய்து விநியோகிப்பதும் தடைபடுவதால் பருவமழைக் காலத்தில் முறையாக தண்ணீர் விநியோகம் இல்லாமலும், மின்சாரம் இல்லாமலும் பொது மக்கள் மற்றும் சுற்றுலாப் பயணிகள் வெகுவாக பாதிக்கப்பட்டு வருகின்றனர்.