ஏர் இந்தியா: தொழில்நுட்பக் கோளாறால் ஒரு நாளில் 7 விமான சேவைகள் ரத்து

கடந்த 12-ஆம் தேதி விமான விபத்துக்குப் பிறகு திங்கள்கிழமை மீண்டும் தொடங்கப்பட்ட அகமதாபாத்-லண்டன் விமான சேவை உள்பட 7 சர்வதேச விமான சேவைகளை ஏர் இந்தியா நிறுவனம் செவ்வாய்க்கிழமை ஒரே நாளில் ரத்து செய்தது.

- 

அகமதாபாத், ஜூன் 17:

அகமதாபாத், சர்தார் வல்லபாய் படேல் விமான நிலையம் மற்றும் லண்டன், காட்விக் விமான நிலையம் இடையிலான ஏர் இந்தியாவின் விமான சேவை, 'ஏஐ 159' எனும் புதிய குறியீட்டுடன் திங்கள்கிழமை முதல் மீண்டும் தொடங்கப்பட்டது. அதன்படி, முதல் விமானம் லண்டன் சென்று, அகமதாபாதுக்கு மீண்டும் திரும்பியது.

இந்நிலையில், அகமதாபாதில் இருந்து செவ்வாய்க்கிழமை பிற்பகல் 3 மணியளவில் லண்டன் புறப்பட இருந்த விமானம், செயல்பாட்டு பிரச்னைகள் காரணமாக கடைசி நேரத்தில் ரத்து செய்யப்பட்டது. இது தொடர்பான அதிகாரபூர்வ அறிவிப்பு ஏர் இந்தியாவின் வலைதளத்தில் வெளியிடப்பட்டது.

இதேபோன்று, பல்வேறு காரணங்களால் ஏர் இந்தியாவின் தில்லி-பாரீஸ், தில்லி-துபை, மும்பை-சான் பிரான்சிஸ்கோ, பெங்களூரு-லண்டன், லண்டன்-அமிருதசரஸ், தில்லி-வியன்னா ஆகிய 6 சர்வதேச விமான சேவைகள் செவ்வாய்க்கிழமை ரத்து செய்யப்பட்டன.