இந்தியா-கனடா தடையற்ற வர்த்தக ஒப்பந்தப் பேச்சு நிகழாண்டுக்குள் நிறைவு

மத்திய வர்த்தக அமைச்சர் பியூஷ் கோயல்

- 

மத்திய வர்த்தக அமைச்சர் பியூஷ் கோயல்

இந்தியா-கனடா இடையே தடையற்ற வர்த்தக ஒப்பந்தப் பேச்சுவார்த்தையை நிகழாண்டு இறுதிக்குள் நிறைவு செய்யும் நோக்கில் இரு நாடுகளும் வேகமாக செயலாற்றி வருகின்றன என்று மத்திய வர்த்தக துறை அமைச்சர் பியூஷ் கோயல் தெரிவித்தார்.

இந்தியா-கனடா இடையே பரஸ்பரம் பலனளிக்கும், சமநிலையான தடையற்ற வர்த்தக ஒப்பந்தத்துக்கான இரு சுற்று பேச்சுவார்த்தைகள் ஏற்கெனவே நடைபெற்று முடிந்தன. மூன்றாவது சுற்றுப் பேச்சுவார்த்தை, அந்நாட்டின் ஒட்டாவா நகரில் கடந்த மே 25-ஆம் தேதி தொடங்கியது.

மே 29-ஆம் தேதி வரை நடைபெறும் இந்தப் பேச்சுவார்த்தையையொட்டி, மத்திய வர்த்தகத் துறை அமைச்சர் பியூஷ் கோயல் மற்றும் மத்திய குழுவினர் கனடாவுக்கு மே 25-ஆம் தேதி சென்றடைந்தனர். ஒட்டாவாவில் கனடா வர்த்தகத் துறை அமைச்சர் மனீந்தர் சித்துவுடன் அமைச்சர் கோயல் திங்கள் கிழமை இருதரப்பு பேச்சுவார்த்தையில் ஈடுபட்டார். அப்போது, வர்த்தகம் மற்றும் முதலீடுகளை விரிவாக்கும் வழிமுறைகள் குறித்து இருவரும் ஆலோசித்தனர்.