மு.க.ஸ்டாலினுக்கு எதிரான தேர்தல் வழக்கு: ஆதாரங்கள் குறித்து உச்சநீதிமன்றம் கேள்வி

தமிழக சட்டப் பேரவைக்கு 2011-ஆம் ஆண்டு நடைபெற்ற தேர்தலில் கொளத்தூர் தொகுதியில் மு.க.ஸ்டாலின் வெற்றியை எதிர்த்து தாக்கல் செய்யப்பட்ட மேல்முறையீட்டு வழக்கில், மனுதாரரான சைதை துரைசாமி உரிய ஆவணங்கள் மற்றும் ஆதாரங்கள் தாக்கல் செய்யவில்லை என உச்சநீதிமன்றம் கடும் ஆட்சேபம் தெரிவித்தது.

- நமது நிருபர்

மு.க. ஸ்டாலினை எதிர்த்து அதிமுக சார்பில் போட்டியிட்டு தோல்வி அடைந்த சைதை துரைசாமி தாக்கல் செய்துள்ள மேல்முறையீட்டு மனு மீதான விசாரணை நீதிபதிகள் ஜே.கே. மகேஸ்வரி மற்றும் விஜய் பிஷ்நோய் ஆகியோர் அடங்கிய உச்சநீதிமன்ற அமர்வில் புதன்கிழமை நடைபெற்றது.

அப்போது மனுதாரரான சைதை துரைசாமி தரப்பு மூத்த வழக்குரைஞர் டி.எஸ். நாயுடு வாதிட்டதாவது: 2011 தேர்தலில் திமுக வாக்குச்சாவடி சீட்டு விநியோகம் செய்தபோது அதில் தங்களுடைய சின்னத்தைப் பொறித்து வழங்கினர். தேர்தல் நடத்தை விதிக்கு மாறாக, மு.க. ஸ்டாலினின் அறிவுறுத்தலின்படி இவ்வாறு வாக்குச்சாவடி சீட்டில் சின்னம் பொறித்து வழங்கி இருந்தார்கள். மேலும், பணம் பட்டுவாடா செய்தது, பரிசுப் பொருள்கள் வழங்கியது, வாக்குச்சாவடி சீட்டில் சின்னம் பொறித்து விநியோகம் செய்தது என அனைத்தும் விடியோ பதிவு செய்யப்பட்டுள்ளது என்றார்.