மாணவர்களின் வளர்ச்சிக்கானது தேசிய கல்விக் கொள்கை

குடியரசு துணைத் தலைவர் சி.பி. ராதாகிருஷ்ணன்

- 

மாணவர்களின் ஒட்டுமொத்த கல்வி வளர்ச்சிக்காக உருவாக்கப்பட்டதே, தேசிய கல்விக் கொள்கை என்று புதுச்சேரி மத்திய பல்கலைக்கழக பட்டமளிப்பு விழாவில் குடியரசு துணைத் தலைவர் சி.பி. ராதாகிருஷ்ணன் பேசினார்.

புதுச்சேரி மத்திய பல்கலைக்கழகத்தின் 30-ஆவது பட்டமளிப்பு விழா திங்கள்கிழமை நடைபெற்றது. இதில் மாணவர்களுக்குப் பட்டங்களை வழங்கி பல்கலைக்கழக வேந்தரும், குடியரசு துணைத் தலைவருமான சி.பி. ராதாகிருஷ்ணன் பேசியதாவது:

புதுச்சேரி பல்கலைக்கழகம் தற்போது 'ஏ பிளஸ்' தகுதி பெற்றுள்ளது. மேலும், சர்வதேச, தேசிய அளவில் 130 புரிந்துணர்வு ஒப்பந்தங்கள் மேற்கொண்டு சிறப்பாகச் செயல்பட்டு வருகிறது. உலகத்தில் உள்ள 2 சதவீத உயர் விஞ்ஞானிகளின் பட்டியலில் இங்கு பணியாற்றும் பேராசிரியர்களில் 28 பேர் இருக்கின்றனர். ஸ்டான்போர்டு பல்கலைக் கழகம் நடத்திய கருத்துக் கணிப்பு இதைத் தெரிவித்துள்ளது.

நாட்டின் கலாசாரத்தை பிரதிபலிக்கும் வகையில் புதுச்சேரி மத்திய பல்கலைக்கழகம் வங்கக் கடலோரம் அமைந்துள்ளது. புதுச்சேரியில் மகாகவி பாரதியார் வாழ்ந்திருக்கிறார். புரட்சிக் கவிஞர் பாரதிதாசன் பிறந்திருக்கிறார். புகழ்பெற்ற இந்த மண்ணில் மகான் அரவிந்தரின் தொலைநோக்குப் பார்வையில் அறிவு, தத்துவம் சிறப்பிடம் பெற்றுள்ளது.