வங்கதேசம்: மேலும் ஒரு மாணவர் தலைவர் மீது துப்பாக்கிச்சூடு

வங்கதேசத்தில் கடந்த 2024-ஆம் ஆண்டு நடந்த மாணவர்கள் போராட்டத்தில் முன்னணி வகித்த ஷரீஃப் உஸ்மான் ஹாதி மர்ம நபர்களால் சுட்டுக் கொல்லப்பட்ட நிலையில், தற்போது அந்தப் போராட்டத்தை வழிநடத்திய மேலும் ஒரு மாணவர் தலைவர் மர்ம நபர்களால் திங்கள்கிழமை சுடப்பட்டார்.

- 

வங்கதேசத்தில் முன்னணிக் கட்சியாக திகழும் தேசிய குடிமக்கள் கட்சியின் (என்சிபி) குல்னா மண்டலத் தலைவரும் கட்சியின் தொழிலாளர் முன்னணி மத்திய ஒருங்கிணைப்பாளருமான மொதாலெப் ஷிக்தெர் மீதுதான் தென்மேற்கு குல்நா நகரில் இந்தத் தாக்குதல் நடத்தப்பட்டது.

ஹாதியை தலையில் சுட்டது போல, இவர் மீதும் மர்ம நபர்கள் தலையைக் குறிவைத்து சுட்டுள்ளனர். இந்தத் தகவலை அந்தக் கட்சியின் இணை முதன்மை ஒருங்கிணைப்பாளரும் மருத்துவருமான மஹ்முதா மிது தனது ஃபேஸ்புக் பக்கத்தில் பதிவிட்டார்.

உயிருக்கு ஆபத்தான நிலையில் குல்னா மருத்துவக் கல்லூரி மருத்துவமனையில் ஷிக்தெருக்கு தீவிர சிகிச்சை அளிக்கப்பட்டு வருகிறது.

ஹாதி உயிரிழப்பால் வங்கதேசத்தில் மீண்டும் வன்முறை வெடித்துள்ள நிலையில், ஷிக்தெர் மீதான தாக்குதல் அங்கு பதற்றத்தை மேலும் அதிகரிக்க வாய்ப்புள்ளதாக அதிகாரிகள் தெரிவித்தனர்.