பால் நிறுவன மேலாளர் தற்கொலை வழக்கில் அரசியல் பின்புலம் இல்லை

சென்னை காவல் ஆணையர்

- 

சென்னை, ஜூலை 12: சென்னை அடுத்த புழலில் தனியார் பால் நிறுவன மேலாளர் தற்கொலை வழக்கில், அரசியல் பின்புலம் ஏதுமில்லை என சென்னை பெருநகர காவல் ஆணையர் ஏ.அருண் தெரிவித்தார்.

சென்னை புழலில் தனியார் பால் தயாரிப்பு நிறுவனத்தில் ரூ.40 கோடி கையாடல் செய்த விவகாரத்தில், அந்த நிறுவனத்தின் கருவூல மேலாளர் நவீன் பொலினேனி சில நாட்களுக்கு முன்பு தற்கொலை செய்து கொண்டார். இந்த விவகாரத்தில் காவல் துறை மீது சில அரசியல் கட்சிகள் புகார் கூறிவரும் நிலையில், சென்னை பெருநகர காவல் துறை ஆணையர் ஏ.அருண் செய்தியாளர்களுக்கு சனிக்கிழமை அளித்த பேட்டி:

நவீன் தற்கொலை செய்து கொண்டது குறித்து தீவிர விசாரணை நடைபெறுகிறது. நவீன் தற்கொலை செய்துகொண்டுதான் இறந்தார் என்பது அறிவியல்பூர்வமாக உறுதி செய்யப்பட்டுள்ளது. இணை ஆணையர் தீஷா மிட்டல், நவீன் தற்கொலை வழக்கை விசாரித்து வருகிறார். பால் நிறுவனத்தில் பணம் கையாடல் செய்யப்பட்டது தொடர்பாக நவீனை போலீஸார் நேரில் அழைத்து விசாரிக்கவில்லை.