மீனவர்கள் வாழ்வாதாரத்தைக் காக்கும் ஆழ்கடல் மீன்பிடித் திட்டம்

புதுவையில் தீவிரமாக செயல்படுத்த முடிவு

- வ.ஜெயபாண்டி

புதுச்சேரி, ஏப். 27: புதுவை மீனவர்களின் வாழ்வாதாரத்தை காக்கும் வகையில், மத்திய அரசு திட்டமான பிரதம மந்திரி மீன்வள மேம்பாட்டுத் திட்டம் (பிஎம்எம்எஸ்ஒய்) 4 ஆண்டுக் பிறகு தீவிரமாகச் செயல்படுத்தப்படவுள்ளது.

அதன்படி, காரைக்கால் மீனவர்களுக்கான இலங்கை கடற்படையின் தொல்லையும் முடிவுக்கு வரவுள்ளது.

புதுவை மாநிலம் புதுச்சேரி உள்ளிட்ட 4 கடல் பிராந்திய பகுதிகளைக் கொண்டது. இங்கு, சுமார் 1.30 லட்சம் மீனவர்கள் உள்ளனர். இவர்களில் 30 ஆயிரம் பேர் நேரடி மீன்பிடித் தொழிலில் ஈடுபட்டு வருகின்றனர்.

கடந்த 1960-ஆம் ஆண்டிலிருந்து தமிழகம், புதுவை பகுதி மீனவர்கள் இழுவை வலை மீன்பிடி முறையிலேயே தொழில் செய்து வருகின்றனர். ஆனால், இழுவை வலை மீன்பிடிப்பால் கடலில் பவளப்பாறைகள் உள்ளிட்டவை சேதமடைந்துள்ளதாகக் கூறப்படுகிறது. இதனால், மீன்வளமும் குறைந்துவிட்டது.

மீனவர்களிடையே மோதல்: அந்தந்த பகுதிகளில் மீன்வளம் குறைந்ததால் மீனவர்கள் அடுத்த கடல் பகுதிக்குச் செல்லும் கட்டாயம் ஏற்பட்டுள்ளது. இதனால், புதுச்சேரி பகுதியில் உள்ள 465 விசைப்படகு மீனவர்களில் பெரும்பாலானோர் சென்னை பழவேற்காடு பகுதிக்குச் சென்று மீன்பிடிப்பில் ஈடுபடுகின்றனர்.

இதனால், புதுச்சேரி மீனவர்களுக்கும், பழவேற்காடு மீனவர்களுக்கும் அடிக்கடி மோதல் ஏற்பட்டு, சட்டம்-ஒழுங்குப் பிரச்னை ஏற்படுகிறது. அத்துடன் புதுச்சேரி பகுதி கடலில் 3 நாட்டிகல் கடல் எல்லைக்குள்ளும் விசைப்படகுகளில் மீன்பிடிக்க வருவதால், நாட்டுப்படகு மீனவர்களும் அதிருப்தியடைகின்றனர்.

இதனால், உள்ளூர் மீனவர்களுக்குள்ளும் மோதல் ஏற்படும் நிலை உள்ளதாகக் கூறப்படுகிறது.