லெபனானில் இஸ்ரேல் மீண்டும் தீவிர தாக்குதல்

ஏவுகணைத் தாக்குதலுக்கு பதிலடி

- 

பெய்ரூட், மார்ச் 22: தங்கள் நாட்டின் மீது நடத்தப்பட்ட ஏவுகணைத் தாக்குதலுக்குப் பதிலடியாக, லெபனானில் இஸ்ரேல் ராணுவம் சனிக்கிழமை தீவிர வான்வழித் தாக்குதல் நடத்தியது.

இஸ்ரேலுக்கும் லெபனானின் ஹிஸ்புல்லா படையினருக்கும் இடையே கடந்த ஆண்டு நவம்பரில் மேற்கொள்ளப்பட்ட போர் நிறுத்த ஒப்பந்தம் அமலுக்கு வந்ததற்குப் பிறகு அங்கு இஸ்ரேல் நடத்தியுள்ள மிகக் கடுமையான தாக்குதல் இது.

முன்னதாக, லெபனானில் இருந்து இஸ்ரேலை நோக்கி சிறியவகை ஏவுகணைகள் வீசப்பட்டன. அதையடுத்து, இஸ்ரேல்-ஹிஸ்புல்லா போர் நிறுத்த ஒப்பந்தம் முறியும் என்ற அச்சம் எழுந்தது. அதை உறுதிப்படுத்துவதைப் போல் லெபனானில் இஸ்ரேல் ராணுவம் தற்போது தீவிர வான்வழித் தாக்குதல் நடத்தியுள்ளது.

இது குறித்து இஸ்ரேல் பிரதமர் அலுவலகம் சனிக்கிழமை வெளியிட்டுள்ள அறிக்கையில், 'லெபனானில் ஏராளமான இலக்குகளைக் குறிவைத்து தாக்குதல் நடத்த பிரதமர் உத்தரவிட்டுள்ளார்' என்று தெரிவிக்கப்பட்டுள்ளது.

இஸ்ரேலுக்கும் ஈரான் ஆதரவு பெற்ற ஹமாஸ் படையினருக்கும் கடந்த 2023 அக்டோபர் 7-ஆம் தேதி முதல் கடுமையான போர் நடைபெற்றுவருகிறது.