தேர்தல் நேரத்தில் கேஜரிவால் கைதுஏன்?

அமலாக்கத் துறையிடம் உச்சநீதிமன்றம் கேள்வி

கலால் கொள்கை தொடர்பான சட்டவிரோத பணப் பரிவர்த்தனை வழக்கில் மக்களவைத் தேர்தலுக்கு முன்பாக தில்லி முதல்வர் அரவிந்த் கேஜரிவால் கைது செய்யப்பட்டது ஏன் என்று அமலாக்கத் துறையிடம் உச்சநீதிமன்றம் செவ்வாய்க்கிழமை கேள்வியெழுப்பியது.

மேலும் நான்கு கேள்விகளை முன்வைத்த உச்சநீதிமன்றம், வரும் வெள்ளிக்கிழமை (மே 3) பதிலளிக்குமாறு அமலாக்கத் துறைக்கு அறிவுறுத்தியது.

தில்லி கலால் கொள்கை முறைகேடு வழக்கில் அரவிந்த் கேஜரிவாலை அமலாக்கத் துறை கடந்த மார்ச் 21-ஆம் தேதி கைது செய்தது. தற்போது நீதிமன்றக் காவலில் அவர் திகார் சிறையில் அடைக்கப்பட்டுள்ளார்.

இதனிடையே, கைது நடவடிக்கைக்கு எதிராக கேஜரிவால் தரப்பில் தாக்கல் செய்யப்பட்ட மனுவை உச்சநீதிமன்றம் விசாரித்து வருகிறது. நீதிபதிகள் சஞ்சீவ் கன்னா, தீபாங்கர் தத்தா ஆகியோர் அடங்கிய அமர்வு முன் 2-ஆவது நாளாக செவ்வாய்க்கிழமை விசாரணை நடைபெற்றது. அப்போது, அமலாக்கத் துறை சார்பில் ஆஜரான கூடுதல் சொலிசிட்டர் ஜெனரல் எஸ்.வி.ராஜுவிடம் நீதிபதிகள் 5 கேள்விகளை முன்வைத்தனர்.