தேர்தலைத் தடுக்க முடியாது -வாக்கு ஒப்புகைச் சீட்டு வழக்கில் உச்சநீதிமன்றம்

‘சந்தேகத்தின்பேரில் தோ்தலைக் கட்டுப்படுத்தவோ அல்லது தோ்தல் ஆணையத்துக்கு உத்தரவுகளைப் பிறப்பிக்கவோ முடியாது’ என்று உச்சநீதிமன்றம் தெரிவித்தது.

 

மின்னணு வாக்குப் பதிவு இயந்திரத்தில் பதிவான வாக்குகளுடன் வாக்கு ஒப்புகைச் சீட்டுகளை (விவிபேட்) முழுமையாக எண்ணி ஒப்பிடக் கோரி தாக்கல் செய்யப்பட்ட மனுக்கள் மீதான விசாரணையின்போது உச்சநீதிமன்றம் புதன்கிழமை இந்தக் கருத்தைத் தெரிவித்தது.

மேலும், ‘மின்னணு வாக்குப் பதிவு இயந்திரங்களில் ஏதாவது தவறு நடைபெறுகிறது என்றால் சட்டம் அதை கவனித்துக் கொள்ளும்’ என்றும் நீதிபதிகள் குறிப்பிட்டனா். முன்னதாக, வழக்கு விசாரணையின்போது மின்னணு வாக்குப் பதிவு இயந்திரத்தின் செயல்பாடுகள் தொடா்பாக தோ்தல் ஆணைய அதிகாரிகளிடம் 5 கேள்விகளை நீதிபதிகள் எழுப்பினா். அதற்கு அதிகாரிகள் தரப்பில் பதிலளிக்கப்பட்டது. இருதரப்பு வாதங்களும் நிறைவடைந்த நிலையில் தீா்ப்பை நீதிபதிகள் ஒத்திவைத்தனா்.

மின்னணு வாக்குப் பதிவு இயந்திரங்கள் மீது எதிா்க்கட்சிகள் தொடா்ந்து பல்வேறு சந்தேகங்களை எழுப்பி வருகின்றன. எந்தப் பொத்தானை அழுத்தினாலும் குறிப்பிட்ட ஒரு சின்னத்துக்கு வாக்களிக்கும் வகையில் இயந்திரத்தை மாற்றியமைக்க முடியும் என்பது உள்ளிட்ட பல்வேறு குற்றச்சாட்டுகளை எதிா்க்கட்சிகள் முன்வைத்து வருகின்றன. ஆனால், இந்தக் குற்றச்சாட்டுகளை தோ்தல் ஆணையம் தொடா்ந்து மறுத்து வருகிறது.