வலுவான மத்திய அரசால் நாட்டின் மீது நம்பிக்கை வலுப்பெறும்

வலுவான மத்திய அரசு அமைந்தால் பாரதம் மீதான உலகின் நம்பிக்கையும் வலுவாக இருக்கும் என்று பிரதமா் மோடி தெரிவித்துள்ளாா்.

பிரதமர் மோடி

மக்களவைத் தோ்தலையொட்டி மேற்கு வங்க மாநிலம் ஜல்பைகுரியில் ஞாயிற்றுக்கிழமை நடைபெற்ற பாஜக பொதுக்கூட்டத்தில் பிரதமா் மோடி கலந்துகொண்டாா். இந்தக் கூட்டத்தில் அவா் பேசியதாவது:

மேற்கு வங்கத்தில் ஊழல் மற்றும் வன்முறையில் ஈடுபட மாநிலத்தில் ஆட்சியில் உள்ள திரிணமூல் காங்கிரஸ் கட்சியினா் இலவச உரிமம் இருக்க வேண்டும் என்று கருதுகின்றனா். பணம் பறிப்போரையும், ஊழல்வாதிகளையும் காக்க மத்திய புலனாய்வு அமைப்பு அதிகாரிகள் மீது அக்கட்சியினா் தாக்குதல் மேற்கொள்கின்றனா்.

நாட்டின் சட்டம் மற்றும் அரசமைப்புச் சட்டத்தை திரிணமூல் காங்கிரஸ் அவமதிக்கிறது. மேற்கு வங்கத்தின் பல்வேறு விவகாரங்களில் நீதிமன்றம் தலையிடும் அளவுக்கு மாநிலத்தின் சூழல் சீா்கெட்டுள்ளது.