தமிழகத்தில் 56 லட்சம் குழந்தைகளுக்கு சொட்டு மருந்து

போலியோ தடுப்பு முகாம்

தமிழகம் முழுவதும் ஞாயிற்றுக்கிழமை (மாா்ச் 3) நடைபெற்ற போலியோ முகாம்களில் 56.34 லட்சம் குழந்தைகளுக்கு சொட்டு மருந்து வழங்கப்பட்டது.

இந்தியாவில் போலியோவை (இளம் பிள்ளை வாதம்) ஒழிப்பதற்காக ஆண்டுதோறும் 5 வயதுக்குட்பட்ட குழந்தைகளுக்கு 2 தவணைகளில் போலியோ தடுப்பு சொட்டு மருந்து வழங்கப்பட்டு வந்தது. போலியோ ஒழிக்கப்பட்ட நாடுகளின் பட்டியலில் இந்தியாவும் சோ்ந்துள்ள நிலையில், கடந்த 4 ஆண்டுகளாக ஆண்டுக்கு ஒருமுறை மட்டும் சொட்டு மருந்து வழங்கப்படுகிறது. அந்த வகையில் நிகழாண்டில் அந்த முகாம் ஞாயிற்றுக்கிழமை (மாா்ச் 3) நடைபெற்றது.

தமிழகத்தில் 5 வயதுக்குட்பட்ட 57.38 லட்சம் குழந்தைகளுக்கு போலியோ தடுப்பு சொட்டு மருந்து வழங்க இலக்கு நிா்ணயிக்கப்பட்டது. அதன்படி, அரசு ஆரம்ப சுகாதார நிலையங்கள், அரசு மருத்துவமனைகள், அங்கன்வாடி மையங்கள், சத்துணவு மையங்கள், பள்ளிகள் மற்றும் பொது இடங்கள் என மொத்தம் 43,051 மையங்கள் அமைக்கப்பட்டன.