பேரறிவாளன் விடுதலை

உச்சநீதிமன்றம் தீர்ப்பு

பேரறிவாளனை விடுதலை செய்ய தமிழக அமைச்சரவை (அதிமுக அரசு) மூலம் 9.9.2018-இல் ஆளுநருக்கு பரிந்துரை செய்யப்பட்டு, அதன் மீது ஆளுநர் கிட்டத்தட்ட இரண்டரை ஆண்டுகள் முடிவெடுக்காமல் இருந்துள்ளார். இதற்கான காரணம் மற்றும் தாமதம் குறித்து உச்சநீதிமன்றம் விசாரிக்கத் தொடங்கியபோதுதான், மனுதாரருக்கு மன்னிப்பு அளிப்பது தொடர்பான தமிழக அரசின் பரிந்துரையை குடியரசுத் தலைவருக்கு ஆளுநர் அனுப்பிவைத்தார்.

புது தில்லி, மே 18: முன்னாள் பிரதமர் ராஜீவ் காந்தி கொலை வழக்கில் 31 ஆண்டுகளுக்கும் மேலாக சிறைத் தண்டனை அனுபவித்து வரும் ஏ.ஜி.பேரறிவாளனை விடுதலை செய்து உச்சநீதிமன்றம் புதன் கிழமை தீர்ப்பளித்தது.

அரசமைப்புச் சட்டத்தின் 142ஆவது பிரிவின் கீழ் வழங்கப்பட்டுள்ள சிறப்பு அதிகாரத்தைப் பயன்படுத்தி, அவரது மேல்முறையீட்டு மனு மீது உச்சநீதிமன்றம் இந்த உத்தரவைப் பிறப்பித்தது.

முன்னாள் பிரதமர் ராஜீவ் காந்தி கொலை வழக்கில் சாந்தன், முருகன், பேரறிவாளன், நளினி, ஜெயக்குமார்,ராபர்ட்பயஸ்,ரவிச்சந்திரன் ஆகிய 7 பேர் சிறைத்தண்டனை அனுபவித்து வருகின்றனர்.

இந்த நிலையில், 31 ஆண்டுகளுக்கும் மேலாக சிறையில் இருந்துவரும் பேரறிவாளன், தன்னை விடுதலை செய்ய உத்தரவிடக்கோரி உச்சநீதிமன்றத்தில் மனு தாக்கல் செய்திருந்தார்.

இந்த மனு, கடந்த மே 4-ஆம் தேதி விசாரணைக்கு வந்தபோது, தகுதி அடிப்படையில் வாதிட மத்திய அரசு தயாராக இல்லாததால், நீதிமன்றம் அவரை விடுவிக்கும் உத்தரவைப் பிறப்பிப்பது குறித்து பரிசீலிக்க நேரிடும் என்று மத்திய அரசிடம் உச்சநீதிமன்றம் கூறியிருந்தது.